Савет Федэрацыі разарваў пагадненне з Украінай аб Чарнаморскім флоце
- 1.04.2014, 13:28
- 5,463
Спыненне дзеяння расейска-украінскіх пагадненняў па Чарнаморскім флоце было адобрана аднагалосна.
За ўнесены раней Уладзімірам Пуціным і ўхвалены ўчора Дзярждумай закон прагаласавалі 134 расейскіх сенатара. Ім спыняецца дзеянне расейска-украінскіх пагадненняў ад 28 траўня 1997 года - пра параметры падзелу Чарнаморскага флоту, пра статус і ўмовы знаходжання флоту на тэрыторыі Украіны, перадае BBC.
Пад новы закон таксама падпадаюць падпісаныя ў Харкаве пагадненні ад 21 красавіка 2010 года, якія таксама тычацца пытанняў знаходжання расейскага флоту на ўкраінскай тэрыторыі.
"У выніку падпісання 18 сакавіка 2014 года дамовы паміж РФ і Рэспублікай Крым аб прыняцці ў РФ Рэспублікі Крым і ўтварэнні ў складзе РФ новых суб'ектаў прадмет расейска-украінскіх пагадненняў згублены з прычыны фактычнага спынення праваадносінаў арэнды РФ аб'ектаў яе Чарнаморскага флоту на тэрыторыі Украіны", - гаворыцца ў тлумачальнай запісцы.
Цяпер дакумент павінен быць падпісаны прэзідэнтам Расеі.