Войскі РФ на мяжы з Украінай прыведзеныя ў поўную боегатоўнасць
62- 11.04.2014, 8:00
- 56,745
40 тысяч расейскіх салдат гатовыя да ўварвання ва Украіну.
Такую ацэнку сітуацыі на мяжы паміж дзвюма краінамі даў журналістам дырэктар крызіснага цэнтра Вярхоўнага камандавання ваеннымі сіламі НАТА ў Еўропе (SHAPE) брыгадзір Гары Дыкен (Gary Deakin, Велікабрытанія) у чацвер у штаб-кватэры SHAPE, размешчанай у Мансэ (Бельгія).
"Мая ацэнка такая, што гэтыя сілы маюць магчымасці і знаходзяцца ў стане высокай гатоўнасці. Яны размешчаныя блізка да дарог і сродкаў сувязі, у іх ёсць рэсурсы хутка вылучыцца ва Украіну, калі будзе загад", - сказаў Дыкен.
Адказваючы на пытанне, за які прамежак часу гэтыя падраздзяленні могуць уварвацца ва Украіну, брыгадзір канстатаваў, што ў адпаведнасці з "нашымі падлікамі" - 12 гадзін з моманту прыняцця рашэння на вышэйшым узроўні.
Разам з тым, пра такія намеры нічога не вядома, піша "Украинская правда".
"Я б апісаў гэта як пагрозу магчымасцямі - без сумневаў, магчымасці ёсць. Але мы не ўпэўненыя пра намеры рускіх", - сказаў прадстаўнік SHAPE.
Гаворачы пра магчымае прасоўванне расейскіх падраздзяленняў да Прыднястроўя, Дыкен падкрэсліў, што "калі ацэньваць гэтыя падрыхтаваныя сілы, то, без сумневаў, яны могуць нанесці ўдар па ўсходняй Украіне і патэнцыйна яны могуць ісці далей у напрамку Адэсы і згаданага вамі месца".
"Так, магчымасці ёсць, але мы не ведаем, ці ёсць намеры. Цяпер усё робіцца для дээскалацыі сітуацыі, стварэння ўмоў для дыпламатычнага мірнага вырашэння", - дадаў высокапастаўлены вайсковец.
Адказваючы на пытанне аб дзеяннях альянсу ў выпадку прасоўвання расейскіх вайсковых падраздзяленняў ва Украіну, Дыкен растлумачыў, што ў гэтым выпадку дзеянні НАТА будуць накіраваныя на забеспячэнне дасведчанасці аб сітуацыі і на гарантаванне бяспекі саюзнікаў.
Пры гэтым ён падкрэсліў, што меры альянсу "накіраваныя на саюзнікаў, на калектыўную абарону". "Я не мяркую, што мы дыслакуем падраздзяленні ва Украіне", - сказаў Дыкен.
Пры гэтым дырэктар крызіснага цэнтра назваў прысутнасць расейскіх падраздзяленняў паблізу ўкраінскай мяжы "рэальным фактарам, які дэстабілізуе".
"Я занепакоены, так як гэта вельмі здольныя сілы, якія дэстабілізуюць сітуацыю, і нашы саюзнікі нервуюцца, і занепакоеныя з-за пагрозы", - паведаміў ён, дадаўшы, што ў адпаведнасці з ацэнкай станам на сёння прамой пагрозы тэрыторыі НАТА з боку Расеі няма.
У гэтай сувязі Дыкен праінфармаваў, што, у адпаведнасці з чаканнямі, Паўночна-атлантычны Савет ужо ў бліжэйшыя тыдні абмяркуе пакет мер, накіраваных на павелічэнне падтрымкі саюзнікаў.
"Меры будуць прапарцыйныя пагрозе і будуць заключацца ў гарантыях і моцным сігнале", - удакладніў ён, падкрэсліўшы, што адпаведнае рашэнне аб пакеце мер будзе прымацца палітычным кіраўніцтвам.
"Усё, што мы будзем рабіць, будзе зроблена выключна ў заканадаўчых рамках", - дадаў высокапастаўлены вайсковец.
Брыгадзір таксама паведаміў, што, у адпаведнасці з ацэнкай SHAPE, Расея пачала нарошчваць сваю прысутнасць на межах з Украінай адначасова з падзеямі ў Крыме, і іх колькасць у цяперашні час ацэньваецца ад 35 да 40 тысяч. Пры гэтым Дыкен не выключыў, што ўмацаванне расейскага флоту ў Крыме "можа быць пагрозай для Украіны".
Фота з архіва РІА «Новости»