Прэм'ер-міністр Аўстраліі: Знойдзены сігнал зніклага «Боінга»
1- 11.04.2014, 9:33
- 13,283
Аўстралія ўпэўненая, што знайшла сігнал зніклага месяц таму авіялайнера.
Удзельнікі пошукавай аперацыі ўпэўненыя, што сігналы, зафіксаваныя ў зоне пошуку зніклага самалёта кампаніі Malaysia Airlines, належаць «чорным скрыням» «Боінга». Пра гэта распавёў прэм'ер-міністр Аўстраліі Тоні Эбат, перадае BBC.
«Мы вельмі звузілі вобласць пошуку, і мы перакананыя, што знойдзеныя сігналы зыходзяць з «чорных скрыняў» MH370», - цытуе Эбата выданне The Australian.
Аўстралійскі прэм'ер-міністр аднак адмовіўся пакуль раскрываць падрабязнасці аперацыі.
Днём раней стала вядома, што аўстралійскі патрульны самалёт P-3 «Арыён» зафіксаваў новыя сігналы, якія могуць сведчыць пра знаходжанне пад вадой абломкаў авіялайнера.
Самалёт Boeing 777, які рабіў рэйс MH370 з Куала-Лумпура ў Пекін, знік з экранаў радараў восьмага сакавіка. На яго борце знаходзіліся 239 чалавек.