Мясніковіч і пладова-ягадныя напаўняльнікі

Беларусь плануе адмовіцца ад імпарту пладова-ягадных напаўняльнікаў.

Пра гэта заявіў сёння журналістам прэм'ер-міністр Міхаіл Мясніковіч, наведваючы Стаўбцоўскі філіял ААТ «Гарадзейскі цукровы камбінат», паведамляе БелТА.

На працягу 2013 была праведзена поўная рэканструкцыя завода (прытым што ў 2010 годзе рэканструкцыя тут ужо праводзілася), якая абышлася прыкладна ў Br40 млрд. Закуплена ўстаноўка для вытворчасці пладова-ягадных напаўняльнікаў і іх разліву. Пасля праведзенай мадэрнізацыі на Стаўбцоўскім філіяле Гарадзейскага цукровага камбіната пры працы ў дзве змены выпускаюць 3 тысячы тон пладова-ягадных напаўняльнікаў, у тры змены - амаль 4 тысячы тон.

«Такое прадпрыемства - адно ў рэспубліцы і фактычна развязвае рэспубліканскую праблему. Мы ў мінулым годзе завезлі па імпарту 4,5 тысячы тон напаўняльнікаў. Ёсць плошчы, дзе можна пашырыць вытворчасць, і такім чынам цалкам вырашыць патрэба краіны», - адзначыў прэм'ер-міністр.

Міхаіл Мясніковіч падкрэсліў, што пры мадэрнізацыі прадпрыемстваў урад арыентуецца на тое, каб не проста абнавіць вытворчасць, але і развязаць тую ці іншую праблему адпаведнай галіны. Як у выпадку з філіялам Гарадзейскага завода - па пладова-ягадным напаўняльнікам, якія раней даводзілася практычна цалкам імпартаваць. Прэм'ер-міністр адзначыў, што прадукцыя філіяла Гарадзейскага камбіната канкурэнтаздольная. «Трэба проста папрацаваць з аб'ёмамі, з сабекоштам, каб яшчэ больш павысіць канкурэнтаздольнасць і такім чынам адціснуць імпарт», - сказаў ён.

Прадпрыемства забяспечана айчыннай сыравінай, у тым ліку і за кошт уласных сыравінных зон. Асобная лінія будзе задзейнічаная пад перапрацоўку дзікарослых ягад. На філіяле Гарадзейскага цукровага камбіната іх будуць таксама дробна фасаваць. Такая прадукцыя запатрабаваная за мяжой і дазволіць прыцягнуць у краіну больш валютнай выручкі. Пакуль жа нарыхтаваныя дзікарослыя ягады пастаўляюць на экспарт, як сыравіну.