Прэм'ер Ізраіля адмяніў візіт у Пецярбург, куды яго запрасіў асабіста Пуцін

Прэм'ер-міністр Ізраіля Беньямін Нетаньяху адмяніў запланаванае раней на чэрвень наведванне Санкт-Пецярбурга.

Ён павінен быў прысутнічаць на святочным канцэрце разам з прэзідэнтам Расеі Уладзімірам Пуціным, паведамляе NEWSru Israel са спасылкай на «Гаарец».

Запрашэнне на гэтае мерапрыемства Пуцін асабіста перадаў Нетаньяху некалькі месяцаў таму. Паводле дадзеных газеты, Нетаньяху і Пуцін павінны былі сядзець разам у першым шэрагу падчас канцэрту. Сцвярджаецца, што ў паведамленні канцылярыі аб адмене візіту было паказана, што гэта звязана з крызісам ва Украіне.

«Гаарец» сцвярджае, што любыя кантакты з Расеяй цяпер узгадняюцца на ўзроўні прэм'ер-міністра. Была адкладзеная расейска-ізраільская сустрэча ў супрацьдзеянні тэрарызму. Таксама, як паведамляў сайт NEWSru Israel, Ізраіль пастанавіў не накіроўваць свой экіпаж на чэмпіянат свету ў танкавым біятлоне, які ўлетку павінен прайсці пад Масквой.

«Гаарец» таксама адзначае, што дагэтуль Ізраіль дэманстраваў нейтралітэт у адносінах да дзеянняў Расеі на фоне крызіснай сітуацыі на Украіне, што выклікала сур'ёзную заклапочанасць у Вашынгтоне. Так, Ізраіль не браў удзелу ў галасаванні па сітуацыі ў Крыме на сесіі Генеральнай асамблеі ААН, спаслаўшыся на забастоўку ў МЗС.

У той час, як Злучаныя Штаты і Еўразвяз уводзяць санкцыі супраць расейскіх і былых украінскіх дзяржаўных чыноўнікаў, заяўляючы аб недапушчальнасці парушэння цэласнасці Украіны, Ерусалім устрымліваецца ад асуджэння дзеянняў Масквы, абмяжоўваючыся агульнымі заявамі пра неабходнасць мірнага ўрэгулявання крызісу.

Фота: РІА Новости