На пошукі зніклага «Боінга» адправілі падводнага робата

Зніклы малайзійскі «Боінг» пачынаюць шукаць пры дапамозе падводнага робата.

Удзельнікі міжнароднай аперацыі, якая працягваецца ў Індыйскім акіяне, прыступілі да выкарыстання аўтаномнага падводнага апарата «Bluefin-21», піша ІТАР-ТАСС.

«Bluefin-21» - падобны на тарпеду робат, які абсталяваны сонарам. У даўжыню апарат дасягае амаль 5 м, а важыць 750 кг. Ён можа апускацца на глыбіню да 4,5 км і працаваць да 25 гадзін.

Кожнае апусканне будзе працягвацца 24 гадзіны. Першыя 120 хвілін апарат будзе апускацца на дно, 16 гадзін - працаваць, 2 гадзіны - усплываць на паверхню. Наступныя 4 гадзіны спатрэбяцца для перадачы сабранай ім інфармацыі.

Авіялайнер «Боінг 777-200», які рабіў рэйс MH370 з Куала-Лумпура ў Пекін з 227 пасажырамі і 12 членамі экіпажа на борце, знік з экранаў радараў у ноч на 8 сакавіка. Малайзійскія ўлады 24 сакавіка ўстанавілі раён крушэння борта і абвясцілі яго разбітым. Пасажыраў лайнера прызналі загінулымі.