Платону Лебедзеву забаранілі пакідаць Расею

Федэральная міграцыйная служба часова забараніла былому кіраўніку МФА «Менатэп» Платону Лебедзеву выязджаць з Расеі.

Пра гэта 14 красавіка паведамляе прэс -цэнтр Лебедзева і былога кіраўніка «ЮКАСа» Міхаіла Хадаркоўскага.

Пра абмежаванне выезду ў ведамстве паведамілі ў адказ на прадстаўлены Лебедзевым пакет дакументаў для атрымання замежпаспарта. У апублікаванай копіі ліста з ФМС паказана, што забарона звязаная з адкрытай у дачыненні да прадпрымальніка выканаўчай вытворчасцю, піша slon.ru.

Рашэнне ФМС, як адзначылі ў прэс-цэнтры, звязана з прэтэнзіямі падатковых органаў. У 2005 годзе суд пастанавіў, што Лебедзеў і Хадаркоўскі павінны выплаціць дзяржаве каля 17 млрд рублёў.

У студзені Лебедзеў вызваліўся з калоніі, пасля таго як яму скарацілі тэрмін зняволення да фактычна адбытага ў сувязі з лібералізацыяй крымінальнага заканадаўства. Прадпрымальнік адбыў у месцах пазбаўлення волі ў агульнай колькасці дзесяць з паловай гадоў. Пасля вызвалення Лебедзеў заявіў, што мае намер вярнуцца ў бізнес.

Лебедзева і Хадаркоўскага ў 2005 годзе прызналі вінаватымі нібыта ва ўхіленні ад выплаты падаткаў, а ў 2010 годзе - у крадзяжы нафты. Абодвум прадпрымальнікам прызначылі тэрмін зняволення 14 гадоў. Хадаркоўскі выйшаў на волю ў канцы 2013 года, указ аб яго памілаванні падпісаў прэзідэнт Расеі Уладзімір Пуцін. Пасля гэтага былы кіраўнік «ЮКАСа» вылецеў у Германію, а затым пасяліўся ў Швейцарыі, дзе аформіў від на жыхарства.

Фота: Reuters