Супрацоўнікаў «Альфы» ў Славянску расстраляла група дыверсантаў з РФ

Камандаваў групай дыверсантаў афіцэр спецназа Галоўнага выведвальнага ўпраўлення Генштаба УС РФ.

Узброены напад на супрацоўнікаў спецпадраздзялення "Альфа" Службы бяспекі Украіны ў Славянску Данецкай вобласці здзейсніла расейская выведвальна-дыверсійная група пад камандаваннем афіцэра спецназа Галоўнага выведвальнага ўпраўлення Генштаба ўзброеных сіл Расейскай Федэрацыі Ігара Стралкова.

"Перад прыбыццём ва Украіну Стралкоў падчас паездкі ў Маскву, дзе атрымліваў інструктажы з нагоды характару дзейнасці на тэрыторыі Украіны. Устаноўлена, што члены выведвальна-дыверсійнай групы ў складзе больш 30 чалавек пад камандаваннем Стралкова ажыццявілі ўзброены напад на супрацоўнікаў СБУ, падчас якога загінуў 1 супрацоўнік СБУ і трое былі параненыя", - сказаў адзін з кіраўнікоў дэпартамента контрвыведкі Віталь Найда ў сераду на брыфінгу ў Кіеве, піша "Інтэрфакс".

Як паведамлялася, 15 красавіка СБУ распачала крымінальную вытворчасць па факце арганізацыі Стралковым наўмыснага забойства і здзяйснення дзеянняў на шкоду суверэнiтэту, тэрытарыяльнай цэласнасці і недатыкальнасці Украіны, правядзення дыверсійна-падрыўной дзейнасці, а таксама арганізацыі масавых беспарадкаў на тэрыторыі ўсходніх рэгіёнаў нашай дзяржавы.

Тэлевізійная служба навінаў (ТСН) канала 1+1 у панядзелак раніцай паведаміла, што ў Славянску ад рук баявікоў загінулі чацвёра людзей: двух афіцэраў СБУ застрэлілі на блок- пасту на пад'ездзе да горада, таксама аўтамабіль з грамадзянскімі асобамі расстралялі пасярод вуліцы, у выніку чаго загінулі два чалавекі. У той жа час, у СБУ паведамілі, што ў Славянску Данецкай вобласці забіты адзін афіцэр СБУ і трое параненыя. В.а. прэзідэнта Украіны Аляксандр Турчынаў паведаміў, што ў ходзе перастрэлкі загінуў капітан спецпадраздзялення, быў цяжка паранены камандзір "Альфы" і палкоўнік СБУ. Таксама раненні атрымаў супрацоўнік МУС.