Эканоміка Расеі імкліва запавольваецца: спад склаў 12,4%

На прамысловых прадпрыемствах ужо пачаліся сур'ёзныя праблемы.

Як паведаміў Расстат, у першым квартале 2014 года расейская прамысловасць вырасла ў гадавым вымярэнні на 1,1%, аднак у параўнанні з чацвёртым кварталам 2013 года спад склаў 12,4%, пішуць «Новые Известия».

На прамысловых прадпрыемствах ужо пачаліся сур'ёзныя праблемы. Так, найбуйнейшы ў Расеі вытворца грузавікоў «КамАЗ» у першым квартале знізіў вытворчасць машын амаль на чвэрць у параўнанні з мінулым годам. Прычына такой дынамікі крыецца ў зніжэнні попыту на грузавікі ўнутры Расеі. Падобная сітуацыя цяпер назіраецца практычна на ўсіх заводах па выпуску аўтамабіляў. Як адзначаюць эксперты, спад у машынабудаванні пацягне за сабой зніжэнне попыту на металургічную прадукцыю, гэта значыць скарачэнне вытворчасці чакае металургаў і шахцёраў. Зрэшты, масавых звальненняў эксперты не чакаюць, бо заробкі ў Расеі, у адрозненне ад развітых краін свету, не з'яўляюцца асноўным артыкулам выдаткаў прадпрыемстваў.

Расейская эканоміка імкліва запавольваецца. Калі першапачатковыя прагнозы ўрада па тэмпах росту ВУП знаходзіліся на ўзроўні 2,5%, на 2014 год, то цяпер яны зніжаныя да 1%. А міністр фінансаў Расеі Антон Сілуанаў лічыць магчымым нулявы рост ВУП. Негатыўныя тэндэнцыі ў эканоміцы абумоўленыя рэкордным адтокам капіталу з краіны - у першым квартале ён склаў, па дадзеных ЦБ, 50,6 млрд. даляраў. З адтокам капіталу зніжаецца інвестыцыйная дзейнасць. Прычым зніжэнне актыўнасці адбываецца як у здабыўных, так і ў апрацоўчых сектарах прамысловасці.

Па дадзеных Расстата, у сакавіку ў гадавым вымярэнні рост прамысловай вытворчасці склаў 1,4% (2,1% у лютым). Пры гэтым з выключэннем сезонных і каляндарных фактараў гэты паказчык у сакавіку вырас на 0,2 % (0,8% у лютым). Акрамя таго, узровень інвестыцый у эканоміку краіны працягвае скарачацца. Так, у студзені яны знізіліся на 7% да ўзроўню мінулага года, у лютым - на 3,5%.

На думку экспертаў, бягучыя негатыўныя тэндэнцыі прывядуць да спынення шэрагу вытворчасцяў і скарачэння іх персаналу. Як распавяла вядучы навуковы супрацоўнік Цэнтра макраэканамічных даследаванняў ІПЭІ РАНХіГС Вольга Ізраднава, па выніках двух месяцаў 2014 года дынаміка прамысловай вытворчасці ў Расеі застаецца вельмі слабой, практычна нулявой.

«Звесткі аб скарачэнні попыту на прадукцыю і аб частковым прыпыненні вытворчасці, якія паступаюць ад аўтамабілебудаўнічых прадпрыемстваў, вельмі негатыўна адаб'юцца на агульнай дынаміцы прамысловай вытворчасці ў краіне, улічваючы развітую сістэму міжгаліновых сувязяў з металургамі, вытворцамі камплектуючых і хімічных матэрыялаў», - патлумачыла яна.

Самым негатыўным фактарам для прамысловай вытворчасці, на думку эксперта, з'яўляецца рэзкае падзенне інвестыцыйнага попыту, якое аказала ціск на аб'ём выпусканай прадукцыі ў металургіі і сектары вытворчасці будматэрыялаў.

«Гэта тыя сегменты прамысловасці, у якіх занятая вялікая колькасць рабочых, і іх скарачэнне можа справакаваць неспрыяльныя сацыяльныя наступствы», - удакладніла Вольга Ізраднава.

На думку кіраўніка аддзела аналітыкі рэкрутынгавага партала Superjob.ru Валерыі Чарняцовай, цяпер цяжка прагназаваць магчымую глыбіню скарачэнняў персаналу на расейскіх прадпрыемствах.

«Масавыя скарачэнні, як і год таму, праводзяць адзінкі, а менавіта 2% кампаній. Невялікія скарачэнні ў мэтах аптымізацыі колькасці ажыццяўляюць 11% кампаній. Але шэраг кампаній заявілі пра тое, што ўсё ж такі скарачэнні плануюцца, сярод іх у асноўным буйныя і сярэднія кампаніі. Аптымізацыйныя меры закранаюць і вытворчы сектар - прыклад таму ўжо агучаная праграма скарачэння персаналу на «Аўтавазе», - патлумачыла яна.

На думку эксперта, хутчэй за ўсё, у гэтым годзе тэмпы росту попыту на персанал, як і тэмпы росту зарплатных прапаноў, працягнуць зніжацца, так як эканамічных перадумоў для іх павелічэння няма. Узровень беспрацоўя вырасце, але нязначна. Спрыяць росту ўзроўню беспрацоўя будуць заяўленыя скарачэнні на буйных прадпрыемствах.

У сваю чаргу, генеральны інспектар працы агульнарасейскага аб'яднання прафсаюзаў «Саюз прафсаюзаў Расеі» Сяргей Храмаў распавёў, што масавых звальненняў у Расеі не будзе. Справа ў тым, што ў нашай краіне вельмі нізкія зарплаты. «Доля выдаткаў на аплату працы ў агульных выдатках на вытворчасць прадукцыі складае прыкладна 12%. У цывілізаваных краінах яна дасягае 25%. Таму нават у крызісных сітуацыях скарачэнне персаналу не з'яўляецца радыкальным сродкам аптымізацыі выдаткаў і выхадам з праблемы», - мяркуе ён.

Разам з тым ён раіць людзям, якія падпадаюць пад скарачэнне, ніколі не пагаджацца на прапанову працадаўцы звольніцца па ўласным жаданні, так як у дадзеным выпадку яны не атрымаюць кампенсацыйных выплат.