Андрэй Парубій: Вайна з Украіны перакінецца на іншыя краіны

Спыніць яе можа толькі цвёрдая пазіцыя Захаду.

Усходу Украіны пагражае акупацыя, і ўсе вочы звернутыя на сакратара Рады нацыянальнай бяспекі і абароны Украіны (РНБА) Андрэя Парубія. Да яго сцякаецца ўся інфармацыя, ён каардынуе дзеянні службаў бяспекі, аднак, як патлумачыў карэспандэнту Le Temps (пераклад - Инопресса) сам Парубій, яго прастора для манеўру абмежаваная станам узброеных сілаў.

Па словах палітыка, украінскі бок нарэшце атрымаў доказы "інтрыг" расейскіх спецслужбаў: "Мы арыштавалі каля 20 агентаў ГВУ і ФСБ ў Луганскай вобласці. Яны загаварылі, і іх сведчанні засмучаюць. У апошнія гады была створаная сетка з некалькіх сотняў расейскіх агентаў. У іх ёсць схованкі са зброяй, сродкі сувязі, і яны атрымліваюць загады з Масквы праз сувязных. Канфіскаваныя дакументы і зброя не пакідаюць ніякіх сумневаў наконт іх абавязкаў. У цяперашні час ідзе следства, якое неўзабаве прадставіць свае высновы".

"Пачатая Масквой аперацыя была паспяховай толькі напалову, - лічыць Парубій. - У Данецку і навакольных населеных пунктах пануе хаос. Але ў Харкаве, Адэсе, Днепрапятроўску спробы дэстабілізаваць сітуацыю праваліліся. Крэмль спадзяваўся, што рускамоўныя ўкраінцы будуць сустракаць сепаратыстаў з кветкамі, але да падбухторшчыкаў далучыліся толькі экстрэмісты".

Сакратар РНБА паведаміў, што ў "контртэрарыстычнай" аперацыі бяруць удзел спецпадраздзяленні МУС, атрады "Альфа" і "Амега", а таксама выведслужбы - "у агульнай колькасці некалькі тысяч чалавек". "Што тычыцца арміі, то яна мабілізаваная на межах для абароны тэрыторыі ад магчымага расейскага ўварвання, якое можа пачацца з поўначы, з усходу альбо з Прыднястроўя", - удакладніў ён.

"Аддаючы кожны загад, я адчуваю, як у мяне з-пад ног сыходзіць глеба, - кажа Парубій. - Мы атрымалі ў спадчыну армію ў лахманах, неданавучаную і недазабяспечаную. У сваё кіраванне Віктар Януковіч прыклаў усе намаганні для паслаблення нацыянальнай абароны, пазбавіўшы яе сродкаў. Аб'ектыўна ён свайго дасягнуў: армія не гатовая весці вайну, а частка афіцэраў захоўваюць вернасць старому рэжыму. Тое ж самае ў міліцыі і спецслужбах, асабліва на ўсходзе. Мы пачалі наводзіць парадак, але патрабуецца час. Аднак я вывучыў становішча ў войсках і магу запэўніць: там шмат патрыётаў, гатовых змагацца для абароны краіны".

На думку Парубія, сусветная супольнасць павінна даць адпор Уладзіміру Пуціну, узмацніўшы санкцыі супраць Расеі, перадае выданне. "Наша армія не ў стане цягацца з расейскай, - сказаў Парубій, - але яна рыхтуецца, яна зможа аказаць супраціў і нанесці праціўніку сур'ёзныя страты і шкоду. Супраціў на месцах разам з дыпламатычнымі і эканамічнымі санкцыямі могуць пераканаць Уладзіміра Пуціна пускацца ў рызыкоўную ваенную авантуру. У адваротным выпадку - буйнамаштабная вайна; Украіна запалае і іншыя краіны, верагодна, таксама".