У Марыупалі мясцовыя жыхары дапамагалі затрымліваць дыверсантаў
4- 17.04.2014, 13:43
- 22,765
Мясцовыя жыхары Марыупаля дапамагалі праваахоўнікам затрымліваць тых, хто нападаў на вайсковую частку.
Пра гэта распавёў дарадца кіраўніка МУС Станіслаў Рэчынскі ў Антытэрарыстычным цэнтры ў чацвер, паведамляе «Украинская правда».
«Варта адзначыць, што мясцовыя жыхары дапамагалі затрымліваць дыверсантаў, якія разбегліся пасля адбіцця штурму вайсковай часткі», - сказаў ён.
Рэчынскі нагадаў, што вайсковая частка ў Марыупалі ўзмоцненая спецпадраздзяленнем «Амега».
«Гэта тое ж падраздзяленне, з якім мы ўсе, скажам так, цесна размаўлялі падчас Майдана. Вось такі парадокс: цяпер яны вельмі актыўна абараняюць нашу краіну», - сказаў ён.
Рэчынскі дадаў, што частка нападнікаў у Марыўпалі былі ў стане моцнага алкагольнага ап'янення.
Па словах дарадцы кіраўніка МУС, праваахоўныя органы таксама выяўляюць вялікую колькасць наркатычных рэчываў у месцах знаходжання сепаратыстаў, «у прыватнасці, вялікую колькасць метамфітаміну».
Нагадаем, з 6 красавіка расейскія дыверсійныя групы і мясцовыя сепаратысты пачалі планамерныя захопы будынкаў адміністрацый ва ўсходніх абласцях Украіны, а таксама ўпраўленняў МУС і СБУ, якія прывабліваюць баевікоў зброевым арсеналам.
У адказ улады Украіны прынялі рашэнне аб пачатку антытэрарыстычнай аперацыі ва ўсходніх рэгіёнах краіны. На Данбас перакінулі вайскоўцаў і тэхніку.
15 красавіка ў выніку аперацыі ўкраінскіх сілавікоў быў вызвалены захоплены расейскімі дыверсантамі і сепаратыстамі аэрадром горада Краматорск на поўначы Данецкай вобласці.
17 красавіка ўкраінскія вайскоўцы адбілі атаку сепаратыстаў пад кіраўніцтвам афіцэраў ГВУ на вайсковую частку ў Марыупалі на поўдні Данецкай вобласці. Трое нападнікаў былі забітыя, больш за 60 затрыманыя.