Юрый Хашчавацкі: Адэсіты расстраляюць пуцінскіх акупантаў з кулямётаў

Прэтэнзіі Расеі на Адэсу скончацца для Пуціна сумна.

Такое меркаванне выказаў вядомы беларускі рэжысёр Юрый Хашчавацкі, які пракаментаваў сайту charter97.org заяву расейскага кіраўніка пра тое, што «Адэса - не Украіна».

«Я сам з Адэсы. Гэта вольны горад, порта-франка. А ва Украіне волі і свабоды несувымерна больш, чым у Расеі. І калі б Адэсе трэба было выбіраць паміж РФ і Украінай, то, безумоўна, Украіна бліжэй да таго, што ўяўляе з сябе гэты горад. Таму адэсіты будуць супраціўляцца да канца расейскаму бязмежжу і не дадуць Пуціну раскатаць губу на горад», - мяркуе ён.

Рэжысёр адзначыў, што Адэса ў ліку першых стала горадам-героем і сярод яе жыхароў жывыя традыцыі барацьбы.

«Так што калі прыйдуць пуцінскія акупанты, то адэсіты адкапаюць кулямёты і іх расстраляюць. У Адэсе з павагай ставяцца да расейскай культуры, але пры гэтым яе жыхары выдатна разумеюць, што такое цёмная, хлуслівая і бандыцкая ўлада Крамля. І сваёй заявай аб тым, што ў Крыме былі расейскія войскі, Пуцін сёння прызнаў сутнасць гэтай улады, прызнаў, што ён хлус і хлусіў, гледзячы ў вочы ўсяму свету», - падкрэсліў Юрый Хашчавацкі.

Нагадаем, сёння падчас прамой лініі прэзідэнт РФ заявіў аб новых тэрытарыяльных прэтэнзіях. Паўднёва-ўсходнія вобласці Украіны, з ягоных слоў, былі заваяваныя расейскімі вайскоўцамі і былі перададзеныя ў кіраванне Кіева ў сярэдзіне дваццатых гадоў мінулага стагоддзя. «Вось гэта вось Харкаў, Луганск, Данецк, Херсон, Нікалаеў, Адэса не ўваходзілі ў склад Украіны ў царскія часы. Гэта ўсё тэрыторыі, перададзеныя ў дваццатыя гады савецкім урадам, навошта яны гэта зрабілі - Бог іх ведае», - сказаў ён.