НЗ у вайсковай частцы пад Брэстам: прапаршчык адкрыў стральбу

Стральба працягвалася некалькі гадзін.

Сур'ёзнае надзвычайнае здарэнне адбылося ўвечары 17 красавіка ў адной з вайсковых частак, якая дыслакуецца ва ўрочышчы Красны Двор пад Брэстам. 35-гадовы прапаршчык каля 21.00 зачыніўся ў адным з памяшканняў на тэрыторыі падраздзялення і адкрыў стральбу са стралковай зброі.

Па папярэдніх дадзеных tomin.by, прапаршчык загадваў збройным складам, што моцна пагаршала і без таго сур'ёзную сітуацыю - побач знаходзяцца велізарны дачны масіў і воінскія склады. Па некаторых дадзеных, прапаршчык быў злёгку п'яны.

Каля 22:00 гадзін журналісту выдання атрымалася пабываць на месцы падзей. На скрыжаванні дарогі на картынгавы стадыён і з'ездзе да дач адразу ж за старой чыгункай дзяжурылі некалькі экіпажаў ДАІ. Аўтамабілі прапускалі, але дакументы ў многіх кіроўцаў правяралі.

Адзін з мясцовых жыхароў распавёў, што ў частку ўжо прайшлі БТР і дзве машыны хуткай.

На месца надзвычайнага здарэння практычна адразу прыбылі кіраўнікі ўсіх сілавых ведамстваў, Следчага камітэта, пракуратуры, вайскоўцы. У частку выклікалі з лякарні жонку прапаршчыка, дзе яна знаходзіцца з дзіцем. Але ёй не ўдалося пераканаць мужа спыніць стральбу.

Па некаторых дадзеных, мужчына зрашэціў дзверы памяшкання, страляючы з перыядычнасцю 5-10 хвілін. Па трывозе былі паднятыя многія структуры, уключаючы роту аховы, снайпераў, байцоў спецпадраздзяленняў.

Падысці да КПП бліжэй 30 метраў не ўдалося. Стрэлаў каля кантрольна-прапускнога пункта чуваць не было. Але машыны снавалі туды-назад розныя, і з рознымі нумарамі.

Дзяжурны на КПП прыгразіў выклікаць міліцыю. Прыйшлося вяртацца.

У 22:40 крыніца паведаміла, што прапаршчык усё яшчэ «пастрэльвае». А з Менска быццам бы ляціць высокае начальства.

Каля гадзіны ночы 18 красавіка сітуацыя заставалася ранейшай. А каля 01:30 усё завяршылася добра. У гэты час прапаршчык папрасіў папіць. Медыкі ўсыпалі ў шклянку снатворнае, і ён заснуў.

Раніцай 18 красавіка на сайце Міністэрства абароны Рэспублікі Беларусь было апублікаванае паведамленне прэс-службы:

«17 красавіка прапаршчык адной з вайсковых частак Брэсцкага гарнізона, знаходзячыся ў памяшканні склада, зрабіў стрэлы са стралковай зброі. Спалохаўшыся адказнасці за зробленае, з памяшкання склада не выходзіў.

Сумеснымі дзеяннямі спецпадраздзяленняў Міністэрства абароны, КДБ і МУС вайсковец быў затрыманы.

Прычыны яго неадэкватных дзеянняў устанаўліваюцца адпаведнымі спецыялістамі медыцынскага профілю і праваахоўных органаў»