Нямецкі дэпутат: Акупанты абвесцяць «незалежнасць» Данбаса 21 красавіка

Член нямецка-украінскай парламенцкай групы распавёў пра планы Крамля.

Карл-Георг Вельман упэўнены, што Расея датычная да беспарадкаў на ўсходзе Украіны: пратэстамі і захопамі адміністрацыйных будынкаў, на думку дэпутата, кіруюць спецпадраздзяленні расейскіх спецслужбаў.

Як паведамляе Inopressa, пра гэта ён распавёў у сваім інтэрв'ю выданню Focus.

«У Крамлі існуюць планы, згодна з якімі ўжо 21 красавіка паўднёвы ўсход Украіны павінен аб'явіць аб сваёй незалежнасці, пасля чаго новую дзяржаву прызнае Расея. А рэферэндум, правядзенне якога намечана на травень, павінен благаславіць гэты крок. У Крамлі ўпэўненыя, што гэты працэс ужо нельга павярнуць назад», - растлумачыў ён.

Як на ўсё гэта адрэагуюць заходнія краіны, будзе залежаць ад абставінаў, працягвае Вельман. «Бо ніхто не ведае, ці абмяжуюцца рускія Данецкам, ці пойдуць да Кіева і Львова, - лічыць ён. - НАТА ўжо дало зразумець, што не пачне вайну. Але я не веру, што рускія настолькі крутыя, каб пагражаць дзяржавам, якія ўваходзяць у НАТА, і ўвайсці на тэрыторыю Балтыі».

Самым галоўным патрабаваннем моманту для Украіны з'яўляецца палітычны працэс, упэўнены Вельман. «З пункту гледжання мэтазгоднасці Пуцін павінен быць зацікаўлены ў тым, каб сумесна з заходнімі краінамі стабілізаваць сітуацыю на Украіне. Апошняй варта задумацца пра адмову знаходзіцца ў якіх-небудзь блоках, выключыць сяброўства ў НАТА, дамовіцца наконт правоў меншасцяў. Таксама цалкам разумнай была б і федэралізацыі па нямецкім узоры, паколькі гістарычныя і культурныя адрозненні паміж украінскімі рэгіёнамі занадта вялікія». Тым не менш, зараз Расея дзейнічае ірацыянальна, і гэта робіць сітуацыю непрадказальнай і небяспечнай.

Пра матывы Пуціна, дадае дэпутат, «можна толькі гадаць. Так, шмат хто лічыць, што Пуцін адчувае нейкі сакральны імпульс па вяртанні святых рускіх зямель матухне-Расеі». Акрамя таго, 9 траўня ў Расеі будуць святкаваць перамогу над фашызмам, і «нельга выключаць, што Пуцін хоча ўпісаць сябе ў гэты гістарычны кантэкст: пасля распаду Савецкага Саюза Пуцін зноў прывёў краіну да велічы і славы», гаворыцца ў артыкуле.

Фота: thekievtimes.ua