«Белавія» возьме крэдыт і купіць два бразільскіх самалёта

Крэдыт кампанія возьме на 10 гадоў.

У пятніцу, 18 красавіка, у Менску старшынёй праўлення Банка развіцця Рэспублікі Беларусь Сяргеем Румасам і генеральным дырэктарам ААТ «Авіякампанія «Белавія» Анатолем Гусаравым падпісаная дамова аб адкрыцці крэдытнай лініі ў аб'ёме 52 млн. даляраў, піша БелаПАН.

Парк паветраных судоў «Белавія» павялічыцца на два новых самалёта Embraer-195 LR. Першы самалёт з'явіцца ў Менску 30 красавіка, другі - 10 траўня гэтага года. Гэтыя суды прызначаныя для перавозкі 107 пасажыраў у эканамічным (96 месцаў) і бізнес-класах (11 месцаў) абслугоўвання. Яны здольныя выконваць сярэднемагістральныя палёты на адлегласці да 4 тыс. кіламетраў з максімальнай крэйсерскай хуткасцю 980 кіламетраў за гадзіну.

Як распавёў Румас, крэдытная дамова разлічаная на 10 гадоў з нестабільнай адсоткавай стаўкай, якая «ў любым выпадку не перавысіць 9% гадавых». Грошы «Банк развіцця» пачне пералічваць ужо на будучым тыдні.

Новыя самалёты «Белавія» прадасць завод-вытворца (бразільская кампанія). Пасажыры змогуць палётаць на іх ужо ў першыя 5-7 дзён пасля прыбыцця ў Менск. Праўда, рашэнне, якімі менавіта стануць іх першыя рэйсы, пакуль не прынята. У будучыні самалёты будуць лётаць ў Франкфурт, Рым, Мілан, Маскву.

Прагназуецца, што дадатковыя паветраныя судны дазволяць пасажырам «Белавія» часцей лётаць па існуючых маршрутах, а таксама асвойваць новыя напрамкі.

Запланаваны прырост авіяперавозак за кошт рэалізацыі праекта складзе 11%.