Студэнты ПТВ патрабавалі грошы ў жыхара Ліды, пагражаючы запальнічкай

Спроба рабавання была раскрытая аператыўнікамі крымінальнага вышуку Лідскага РАУС.

Трое невядомых у цэнтры Ліды пад пагрозай «пісталета» патрабавалі грошы ў мінака, паведамляе УУС Гарадзенскага аблвыканкама.

Мясцовы жыхар 1991 года нараджэння знаходзіўся на прыпынку грамадскага транспарту. Да яго падышоў хлопец і стаў патрабаваць грошы. Паміж маладзёнамі распачаўся канфлікт на словах. Падчас сваркі з-за прыпынку падышлі яшчэ двое, адзін з іх дастаў пісталет, прыставіў да галавы пацярпелага і пад пагрозай прапанаваў аддаць грошы.

Да прыпынку пад'ехаў аўтобус, і адтуль сталі выходзіць людзі, таму зброю ім давялося схаваць. Пісталет, дарэчы, у выніку апынуўся мудрагелістай запальнічкай. Пацярпелы здагадаўся, што ў хлопцаў наўрад ці апынецца баявая зброя, скарыстаўся сітуацыяй і паспрабаваў прарвацца да аўтобуса. Зламыснікі спрабавалі яго затрымаць, аднак хлопцу ўдалося трапіць ў транспартны сродак, і ўжо адтуль патэлефанаваць у міліцыю.

Па гарачых слядах была арганізавана работа следча-аператыўнай групы Лідскага райаддзела міліцыі, а ўжо раніцай да працы падключыліся калегі з УУС, якія знаходзіліся ў службовай камандзіроўцы.

Падчас работы былі выяўленыя сведкі, складзеныя суб'ектыўныя партрэты падазраваных і праз некаторы час іх асобы былі ўстаноўленыя.

Цяпер праводзіцца праверка з мэтай высветліць падрабязнасці здарэння, ужо ўзбуджаная крымінальная справа ў дачыненні да 19-гадовага студэнта мясцовага тэхнікума.