Пенсіянер з Каліфорніі выйграў $425 мільёнаў у латарэю

Джэк-пот у памеры 425,3 мільёна даляраў дастаўся пенсіянеру Рэйманду Бакстану.

Жыхар штата Каліфорнія купляў латарэйныя квіткі на працягу двух дзесяцігоддзяў, аднак выйграць сапраўды па-буйному яму ўдалося толькі цяпер, адзначае Associated Press.

Розыгрыш праводзіўся ў лютым, аднак Рэйманд Бакстан, які адгадаў усе шэсць нумароў, вырашыў публічна абвясціць аб тым, што з'яўляецца ўладальнікам «шчаслівага квіточка», толькі 1 красавіка. Выбар даты, як удакладнілі арганізатары латарэі, ніяк не звязаны з традыцыйнымі для Дня смеху розыгрышамі, а, хутчэй, сведчыць пра своеасаблівае пачуццё гумару шчасліўчыка, піша Lenta.ru.

Бакстан палічыў за лепшае атрымаць прыз адразу, а не асобнымі выплатамі на працягу 30 гадоў. Згодна з правіламі розыгрышу, у гэтым выпадку сума джэк-поту памяншаецца амаль удвая, і ў выніку шчасліўчык атрымае «ўсяго» 242,5 млн даляраў. Да таго ж з гэтай сумы яшчэ прыйдзецца заплаціць падаткі.

Як прызнаўся Бакстан, пасля таго, як былі абвешчаныя нумары, якія выігралі, ён доўга не мог паверыць, што поспех усміхнуўся менавіта яму. «Я сядзеў перад кампутарам на працягу некалькіх гадзін, не верачы сваім вачам, пастаянна правяраў і пераправяраў лічбы па розных крыніцах. Пасля таго, як прайшоў першы шок, я некалькі дзён не мог спаць», - цытуе пераможцу The Los Angeles Times.

Частку выйграных сродкаў пенсіянер мае намер выдаткаваць на падарожжа, а таксама заснаваць дабрачынны фонд, сродкі з якога пойдуць на праекты ў галіне дзіцячай адукацыі і аховы здароўя.