На прэзідэнта Малдовы падалі ў суд за адмову ад інтэрв'ю
- 23.04.2014, 12:31
- 4,396
З пазовам супраць Нікалае Цімофці выступіла адно з інтэрнэт-выданняў.
Кіраўніка рэспублікі абвінавачваюць у чыненні перашкод працы журналістаў, піша Jurnal.md.
Як распавёў галоўны рэдактар выдання Васіле Нэстасе, паўгода таму ён звярнуўся да прэзідэнта з просьбай аб інтэрв'ю. Ён планаваў задаць пытанні аб рэфармаванні сістэмы правасуддзя, барацьбе з карупцыяй і інтэграцыі ў ЕЗ.
Інтэрв'ю, аднак, не адбылося. Прэс-сакратар прэзідэнта Улад Цуркану спачатку заявіў, што шэраг заяўленых пытанняў варта выключыць. Пасля журналісты так і не атрымалі ад кіраўніка рэспублікі адказу на свой зварот.
«Гэта не што іншае, як злоўжыванне, спроба трымаць прэсу далей ад надзённых праблем грамадства. Гэта спроба пазбегнуць нязручных і сур'ёзных пытанняў», - заявіў з гэтай нагоды Нэстасе.
Свой пазоў выданне накіравала ў суд сталічнага сектара (раёна) Буюканы. Той адмовіўся разглядаць справу, аднак журналісты звярнуліся ў апеляцыйную палату, якая накіравала пазоў на паўторны разгляд.
Фота: arena.md