Лаўроў назваў барацьбу з тэрарыстамі «злачыннай»

Кіраўнік МЗС Расеі незадаволены антытэрарыстычнай аперацыяй у Славянску.

Сяргей Лаўроў лічыць, што менавіта Кіеў павінен рабіць першыя крокі па выкананні "жэнеўскіх дамоўленасцяў", а прымяненне сілы на Усходзе Украіны - "злачыннае рашэнне". Пра гэта ён заявіў на прэс-канферэнцыі ў Ліване, піша "Украинская правда".

Сяргей Лаўроў у чарговы раз выказаў пазіцыю Расеі, якая складаецца ў тым, што ва Украіне адбыўся ўзброены дзяржаўны пераварот. Ён лічыць, што новая ўкраінская ўлада парушыла дамоўленасці з Януковічам ад 21 лютага і не мае намеру выконваць "Жэнеўскія дамоўленасці".

"Там ясна сказана, што не павінна быць ніякага гвалту, а выкарыстанне арміі, ды яшчэ і з апорай на радыкал-нацыяналістаў супраць народа з'яўляецца абсалютна непрымальнай формай гвалту. Больш за тое, я лічу, што гэта - злачыннае рашэнне, - заявіў Лаўроў. - Тое, што зараз адбываецца ў Славянску, тое, што адбылося ноччу ў Марыупалі, - гэта ўсё вынік безадказнай палітыкі, якая абапіраецца на ўльтранацыяналістычныя і неанацысцкія групоўкі".

З 12 красавіка адмінбудынкі горада Славянска занятыя ўзброенымі тэрарыстамі. Падчас правядзення антытэрарыстычнай аперацыі падраздзяленнямі Міністэрства ўнутраных спраў і Міністэрства абароны Украіны разблакаваныя і знішчаныя тры блокпоста незаконных узброеных фармаванняў у паўночна-усходняй частцы горада Славянск Данецкай вобласці. Па дадзеных МУС, падчас баявога сутыкнення да 5 тэрарыстаў было знішчана.