Чысты прыбытак «Беларуськалію» ў 2013 годзе ўпаў у пяць разоў

ААТ «Беларуськалій» за 2013 год атрымаў чысты прыбытак у памеры Br1 трлн 354,9 млрд.

Пра гэта паведамляецца ў гадавой справаздачы акцыянернага таварыства.

Як адзначаецца ў дакуменце, за 2012 год чысты прыбытак таварыства склаў Br6 трлн 698,8 млрд. Такім чынам, за 2013 год прыбытак «Беларуськалію» скараціўся ў 4,9 разы, ці на 79,7%, перадае «Інтэрфакс».

Прыбытак кампаніі да падаткаабкладання склаў за 2013 год Br1 трлн 595,4 млрд і скараціўся ў параўнанні з 2012 годам у 5 разоў. Прыбытак ад рэалізацыі прадукцыі склаў Br3 трлн 654,7 млрд (у 2,2 разы менш), у тым ліку выдаткі на бягучую дзейнасць у 2013 годзе склалі Br1 трлн 499,9 млрд супраць Br1 трлн 260,1 трлн у 2012 годзе. Страты ад інвестыцыйнай дзейнасці склалі за 2013 год Br559,36 млрд супраць даходаў у памеры Br1 трлн 363,6 млрд у 2012 годзе.

За 2013 год прадпрыемства выплаціла Br240,49 млрд падатку на прыбытак супраць Br1 трлн 345,47 млрд у 2012 годзе.

Выручка ад рэалізацыі прадукцыі, работ і паслуг таварыства за 2013 год склала Br14 трлн 756,57 млрд і скарацілася ў параўнанні з 2012 годам на 19,7%, сабекошт рэалізаванай прадукцыі, работ і паслуг склаў Br11 трлн 101,8 млрд і вырас у параўнанні з 2012 годам на 6,4%.

За 2013 год Беларуськалій павялічыў доўгатэрміновую дэбіторскую запазычанасць у 1,7 разы да Br123,79 млрд. Доўгатэрміновыя абавязацельствы кампаніі склалі Br8 трлн 631,2 млрд на 1 студзеня 2014 года супраць Br8 трлн 833,4 млрд годам раней. За 2013 год таварыства накіравала на выплату дывідэндаў Br24,67 млрд супраць Br919,7 млрд у 2012 годзе.

ААТ «Беларуськалій» з'яўляецца адзіным вытворцам хлоркалію ў рэспубліцы, а таксама адным з найбуйнейшых пастаўшчыкоў калійных угнаенняў на сусветны рынак. Доля прадпрыемства ў сусветнай вытворчасці калійных угнаенняў складае каля 15%, у сусветным экспарце калію - звыш 16%.

Як паведамлялася, у канцы ліпеня 2013 года расейскае ААТ «Уралкалій» адмовілася ад адзінага з «Беларуськаліем» збыту калійных угнаенняў праз агульнага трэйдара - ЗАТ «Беларуская калійная кампанія». Акрамя таго, «Уралкалій» абвясціў аб уласнай новай стратэгіі продажаў, заснаванай на дэмпінгавых коштах і высокіх фізічных аб'ёмах. У сукупнасці гэта прывяло да абвалу сусветнага рынку хлоркалію. На працягу ўсяго IV квартала мінулага года сусветны гандаль калійнымі ўгнаеннямі стагнаваў, кошты апусціліся да каля $300 на тону. Рынак стаў аднаўляцца толькі да канца года.

На працягу 2013 года ўлады Беларусі неаднаразова прымалі меры падатковай падтрымкі Беларуськалію, зніжаючы для яго памер адлічэнняў па падатку на здабычу калійнай солі і рэгулярна выключаючы прадпрыемства з пераліку высокарэнтабельных арганізацый, абавязаных па рашэнні ўрада пералічваць у бюджэт частку прыбытку. Акрамя таго, прадпрыемства было вызвалена ад выплаты экспартнай пошліны.