Сутыкненні ў Кыргызстане: пацярпелі 19 чалавек

На поўначы Кыргызстана ў сутыкненнях удзельнікаў акцыі пратэсту і міліцыі пацярпелі 19 супрацоўнікаў праваахоўных органаў.

Стан дваіх пацярпелых ацэньваецца як цяжкі, перадае казахская служба «Радыё Свабода».

Напярэдадні жыхары вёскі Баа-Церак Бакай-Ацінскага раёна выйшлі на мітынг супраць распрацоўкі залатаруднага радовішча Шыралжын, дзе вядзе выведвальныя работы казахстанская кампанія «Алтын Кумуштак Майнінг». На думку ўдзельнікаў мітынгу, распрацоўка радовішча прывядзе да пагаршэння экалагічнага становішча.

Пасля таго, як мясцовыя ўлады не падтрымалі пратэстоўцаў, яны перакрылі аўтамабільную дарогу Талас - Тараз. Супрацоўнікі міліцыі, якія прыбылі на месца, спрабавалі ўгаварыць іх разблакаваць дарогу, адбыліся сутыкненні.

Аўтадарога заставалася заблакаванай усю ноч. Там сабралася не менш за 200 машын.

Для перамоваў з удзельнікамі пратэсту на месца выехаў новаабраны віцэ-прэм'ер Кыргызстана Абдырахман Маматаліеў і намеснік міністра ўнутраных спраў Калыкбек Сатыбалдзіеў.