13 красавіка ў Маскве пройдзе «Марш праўды»

Расейская апазіцыя правядзе акцыю пратэсту супраць хлусні і прапаганды крамлёўскіх СМІ.

Арганізатарам уяўлялася, што, паколькі абраная тэма выключна актуальная і важная, то з мэрыяй трэба вырашаць пытанне хутка, каб мець больш часу на падрыхтоўку і раскрутку мерапрыемства, піша «Ежедневный журнал». Таму ў паведамленні значыўся традыцыйны маршрут з невялікім удакладненнем. Меркавалася, што цяпер дэманстранты пойдуць не як звычайна, а ў адваротны бок - ад праспекта Сахарава па бульварах, а мітынг адбудзецца на Пушкінскай плошчы. Але дэпартамент грамадскай бяспекі, мабыць, даўно яшчэ прыняў жорсткую ўстаноўку: з першага разу нічога «пятай калоне» не ўзгадняць. Прапанаваны мэрыяй зваротны варыянт абсурдны і смешны - правесці марш па праспекце Сахарава, а ў самым яго канцы, дзесьці каля трох вакзалаў, зладзіць мітынг. Па сутнасці гэта марш на месцы. Таму ніякага маршу не будзе, а будзе мітынг у межах, прапанаваных мэрыяй, - на ўнутраным баку праспекта Сахарава.

Мітынг 13 красавік пройдзе ў незвычайным фармаце. У бліжэйшыя дзень-два ў сацыяльных сетках стартуе конкурс. Нам трэба будзе выбраць лаўрэатаў і пераможцаў адразу ў некалькіх намінацыях, назвы якіх гавораць самі за сябе. Такіх, напрыклад, як «Божая раса», «На блакітным воку», «Хлусіць як дыхае», «Нас усіх ванітуе», «З пенай у рота», «Ніжэй плінтуса». Усё гэта прыдумаў экспертна-сцэнарны савет, у які ўвайшлі, у тым ліку, Леў Рубінштэйн, Дзмітрый Быкаў, Георгій Сатараў. Гэтыя ж людзі і падвядуць вынікі. А на самім мітынгу будуць ускрывацца канверты, аб'яўляцца лаўрэаты і пераможцы, адбудзецца віртуальнае ўручэнне статуэтак (прыз называецца «Махровы ціпун»): таксама будзе праведзены конкурс цытат. Цытатамі, дарэчы, будзе завешаная ўся прастора мітынгу.

Нагадаем, 15 сакавіка 50 тысяч расейцаў выйшлі на «Марш міру і свабоды», які стаў пратэстам супраць нападу Пуціна на Украіну.

Фота: ej.ru