Грабоўскі набраў першае ачко ў НХЛ пасля двухмесячнага прастою праз траўмы

Беларускі форвард клуба НХЛ «Вашынгтон Кэпіталз» Міхаіл Грабоўскі набраў першае бамбардзірскае ачко пасля вяртання на лёд.

Клуб Міхаіла Грабоўскага ў чарговым матчы рэгулярнага чэмпіянату НХЛ саступіў на выездзе «Нью-Джэрсі Девілз» 1:2. Голам у складзе «сталічнікаў» адзначыўся іх лідар і капітан расеец Аляксандр Авечкін, якому Міхаіл Грабоўскі аддаў асістэнцкую перадачу ў першым перыядзе. У двух астатніх 20-хвілінках гульцы апанентаў закідвалі па разу і захавалі пераможны лік да канца сустрэчы. Міхаіл Грабоўскі ў гульні з «Нью-Джэрсі» правёў на пляцоўцы 15 хв 32 сек, выканаў 3 кідкі і завяршыў паядынак з паказчыкам карыснасці «+1».

Усяго на яго рахунку ў 53 матчах сезона 34 (12+22) бамбардзірскія ачкі. Беларускі легіянер «Вашынгтона» не адрозніваўся выніковымі дзеяннямі з 14 студзеня гэтага года, паведамляе БелТА.

Паражэнне ад «Нью-Джэрсі» практычна пазбавіла «Вашынгтон» шанцаў на пападанне ў плэй-оф Кубка Стэнлі. Зараз клуб са сталіцы ЗША ідзе 11-м ва Усходняй канферэнцыі, маючы на сваім рахунку 81 ачко пасля 77 матчаў. Ад зоны плэй-оф ён адстае на 4 ачкі. На 8-м месцы Усходу, які дазваляе працягнуць барацьбу за галоўны трафей НХЛ, цяпер ідзе «Каламбус» (85 ачкоў).

Наперадзе «Вашынгтона» размяшчаюцца «Таронта» (84) і «Нью-Джэрсі» (82). Няпростым выглядае графік пяці сустрэч «сталічнікаў», якія засталіся да заканчэння рэгулярнага чэмпіянату. Каманда правядзе тры гасцявыя гульні з «Нью-Ёрк Айлэндэрз» (5 красавіка), лідарам Захаду «Сэнт-Луіс Блюз» (8 красавіка) і «Каралінай Харыкейнз» (10 красавіка). Далей рушаць услед дзве хатнія гульні з цяперашнім уладальнікам Кубка Стэнлі «Чыкага Блэкхоўкс» (11 красавіка) і заключны матч «гладкага» сезона супраць «Тампа-Бэй Лайтнінг» (13 красавіка).

Нагадаем, Грабоўскі аднавіў у канцы сакавіка выступы ў мацнейшай хакейнай лізе планеты пасля траўмы нагі.