У менскім дзіцячым садку знайшлі жывую андатру (Відэа)
3- 5.04.2014, 13:40
- 11,949
Жывую андатру, якая ўпала ў падвальны праём, убачылі выхаванцы аднаго з дзіцячых садкоў у менскім мікрараёне Сухарава.
«Сустрэчы з дзікім звярком дзеці ўзрадаваліся, а выхавальнікі не на жарт расхваляваліся і выклікалі супрацоўнікаў Менскай міжраённай інспекцыі аховы жывёльнага і расліннага свету», - паведамляе Дзяржаўная інспекцыя аховы жывёльнага і расліннага свету пры прэзідэнце Рэспублікі Беларусь.
З дапамогай сеткавых прылад лоўлі, канфіскаваных у браканьераў, дзяржінспектару ўдалося вылавіць жывёлу са склепа.
«Андатру адпусцілі ў бліжэйшы вадаём ля вёскі Яркова, з якога яна, хутчэй за ўсё, і пранікла на тэрыторыю горада», - праінфармавалі ў дзяржінспекцыі.
Вясной 2012 года СМІ паведамлялі пра тое, што ў цэнтры горада Глыбокае Віцебскай вобласці шалёная андатра напала на дзяўчыну. Адбіцца ад звера дапамог хлопец, якому ўдалося забіць андатру. Міліцыянт, які дзяжурыў у будынку райвыканкама, выклікаў медыкаў. Дзяўчына ад укусаў не пацярпела, звер паспеў парваць на ёй толькі куртку.