Ангела Меркель: ЕЗ увядзе новыя эканамічныя санкцыі супраць РФ
29- 5.04.2014, 18:03
- 33,602
Канцлер ФРГ прыстрашыла расейскага прэзідэнта новымі санкцыямі ў выпадку эскалацыі канфлікту з Украінай.
Пра гэта Ангела Меркель заявіла на партыйным з'ездзе ў Берліне, паведамляе агенцтва dpa.
«Калі і ў далейшым будзе замах на тэрытарыяльную цэласнасць Украіны, то мы будзем вымушаныя ўвесці эканамічныя санкцыі», - падкрэсліла яна. Са слоў Меркель, «ніхто не падманваецца» з нагоды кансенсусу ўнутры ЕЗ адносна адказу Расеі. Гэтыя словы кіраўніка нямецкага ўрада прагучалі ў кантэксце магчымасці эканамічных санкцый супраць Расеі пасля анэксіі ўкраінскага Крыму. Меркель выказала шкадаванне, што ў часы ўсё больш інтэнсіўнага супрацоўніцтва з Расеяй, там перамагло «мысленне тэрытарыяльных прэтэнзій праз тое, што людзі ва Украіне патрабавалі збліжэння з Еўропай».
У той жа час канцлер Нямеччыны падкрэсліла, што ніхто ў Еўропе не хоча абарваць дыялог з Масквой.
Нагадаем, у ЕЗ ужо гучаць галасы, што Расея будзе ажыццяўляць ціск і на Грузію і Малдову з дапамогай тэрытарыяльных канфліктаў.