ЗША дазволілі кампаніі Boeing прадаваць у Іран запчасткі да самалётаў

Міністэрства фінансаў ЗША выдала авіябудаўнічымі кампаніі ліцэнзію на экспарт у Іран некаторых запасных частак для самалётаў.

У Boeing не было афіцыйных кантактаў з Тэгеранам з часоў Ісламскай рэвалюцыі 1979 года, перадае BBC.

У заяве Boeing падкрэсліваецца, што ліцэнзія была выдадзеная дзеля бяспекі палётаў, і што запчасткі, пра якія ідзе гаворка, не з'яўляюцца прадукцыяй падвойнага прызначэння.

Гэты крок быў зроблены ў рамках часовага пагаднення аб змякчэнні санкцый у дачыненні да Тэгерана, якога дзяржсакратар ЗША Джон Кэры дасягнуў з Іранам у лістападзе мінулага года.

Згодна з гэтай дамовай, Іран прыпыняе сваю ядзерную праграму ў абмен на змякчэнне санкцый з боку такіх краін, як Брытанія, Кітай і ЗША. Амэрыканская кампанія General Electric паведаміла ў пятніцу, што яна атрымала дазвол на рамонт 18 рухавікоў, прададзеных Ірану ў канцы 1970- х гадоў.

Дакрызісныя самалёты ў крызісным стане

Авіякампанія Iran Air да гэтага часу выкарыстоўвае пасажырскія самалёты, набытыя яшчэ да крызісу з захопам закладнікаў у 1979 годзе, калі было захопленае пасольства ЗША ў Тэгеране і 52 амэрыканцы правялі ў зняволенні 444 дні. Іран сцвярджае, што санкцыі, накладзеныя на краіну ў 1979 годзе, не дазваляюць падтрымліваць самалёты ў належным стане, што стварае пагрозу бяспецы.

За апошнія 25 гадоў з іранскімі самалётамі адбылося больш за 200 аварый, у выніку якіх загінулі больш за 2 тысячы чалавек.

У кампаніі Boeing заявілі, што выдадзеная міністэрствам фінансаў ЗША ліцэнзія распаўсюджваецца толькі на запчасткі, патрэбныя для бяспекі палётаў самалётаў, якія былі прададзеныя Ірану да рэвалюцыі 1979 года.

Існы цяпер рэжым санкцый не дазваляе продаж Ірану новых самалётаў. Калі санкцыі будуць знятыя цалкам, Ірану спатрэбіцца купіць сотні новых самалётаў, адзначаюць карэспандэнты.