Ператрус у Аршанскім райвыканкаме: арыштаваны «вертыкальшчык»

Супраць намесніка старшыні Аршанскага райвыканкама Івана Хурбатава ўзбуджаная крымінальная справа.

Са словаў відавочцаў, на гэтым тыдні прайшлі ператрусы дома ў чыноўніка і ў яго службовым кабінеце ў райвыканкаме. Сам Іван Хурбатаў затрыманы следчымі органамі. Крымінальная справа звязана з дзейнасцю прыватнай фірмы «ТопЕўраБуд», заснавальнікам якой з'яўляецца сын чыноўніка, піша мясцовы партал orsha.eu.

Чыноўніку інкрымінуецца частка 3 артыкула 426 Крымінальнага кодэкса Беларусі «Перавышэнне ўлады або службовых паўнамоцтваў». Яна прадугледжвае пакаранне ў выглядзе пазбаўлення волі на тэрмін ад 3 да 10 гадоў з пазбаўленнем права займаць пэўныя пасады або займацца пэўнай дзейнасцю.

Цяпер Іван Хурбатаў знаходзіцца ў ізалятары часовага ўтрымання Аршанскага РАУС. Абвінавачванне затрыманаму падобна пакуль не прад'яўлена. Расследаванне справы вядзе Упраўленне Следчага камітэта Віцебскай вобласці.

Як раней паведамляла крыніца сайта charter97.org, вядомая ў вузкім коле фірма «ТопЕўраБуд» атрымлівала ўсе заказы райвыканкама на будаўнічыя працы.

«Праваахоўныя органы ў Оршы схапіліся за галаву, калі толькі першыя вынікі праверкі яе дзейнасці выплылі на паверхню. Як высветлілася, фірма гэтая з выгляду нічым не характэрная, якая не мае ў горадзе ні офіса, ні юрыдычнага адрасу, якая не валодае ні адной адзінкай тэхнікі, каб выконваць нават самыя простыя будаўнічыя работы, рэгулярна апыналася пераможцам разнастайных тэндэраў у сферы будаўнічых работ», - пісаў раней чытач нашага сайта.

Як стала вядома, аршанскія чыноўнікі і кіраўніцтва вышэйстаячага Віцебскага аблвыканкама зрабілі ўсё магчымае, каб схаваць вынікі праверкі. Ніякіх вынікаў пра яе не прасачылася ў СМІ, маўчаць і прэс-службы Следчага камітэта, міліцыі, пракуратуры. Незалежныя назіральнікі схіляюцца да думкі, што хутчэй за ўсё справу паспрабуюць замяць.