Пуцін у цугцвангу

Да чаго Пуцін давёў Расею.

Здаецца, зусім нядаўна была зімовая Алімпіяда ў субтропіках. Выдатна праведзеная. З бліскучым закрыццём, якім захапляўся ўвесь свет. І што ж? Ужо на наступны дзень пачалася антыўкраінская істэрыя.

Гледзячы на спаборніцтвы пад дружнае «РАСЕЯ НАПЕРАД» на спартовых арэнах і трасах, Пуцін, аказваецца, думаў пра «РАСЕЮ НАПЕРАД» на танках і іншай баявой тэхніцы. У выніку ад сочынскай Алімпіяды ў памяці людзей засталіся тры выявы: выступ фігурысткі Ляпніцкай, змрочны Пуцін і сляза, якая цячэ па шчацэ мішкі, які з'яўляўся сімвалам Алімпіяды. Сляза, якая рэтраспектыўна стала сімвалам Сочынскіх Гульняў - што арганізатарамі і не планавалася.

Навошта былі выдаткаваныя пяцьдзесят мільярдаў даляраў - больш, чым за ўвесь час кіравання Пуціна на навуку, на медыцыну для сельскага насельніцтва, на жыллё ветэранам? Бо пасля распачатых байкотаў і санкцый да Расеі, у Сочы, як дарэчы і ў Крым, ніхто з іншых краін у бліжэйшыя гады не паедзе. А за час, калі збудаванні, дарогі і трасы пустуюць, яны руйнуюцца. Бо іх падтрыманне варта велічэзных грошай. Якія прыйдзецца толькі марнаваць. Яно вядома, як у песні спяваецца, мы за цаной не пастаім. Але ў імя чаго? Не вайна ж напаўшым на Федэрацыю Гітлерам, а з «братэрскім славянскім народам».

Пуцін настолькі ўпэўнены ў сабе і плюе на ўсё чалавецтва, што нават не палічыў патрэбным дэнансаваць дамову, згодна з якой Расея (разам з Вялікабрытаніяй і Злучанымі Штатамі) з'яўляецца гарантам тэрытарыяльнай цэласнасці Украіны. Якую мог за адзін дзень правесці ў Думе да прыяднання Крыму, каб надаць анэксіі хаця б бачнасць легітымнасці. Нахабства, якое, «сравненья все перебирая, не знаешь, с чем сравнить».

Дрэнныя для Федэрацыі навіны, накіраваныя на яе ізаляцыю, паступаюць ледзь не кожны дзень.

У расейскім МЗС падверглі крытыцы амерыканскі банк «Джэй-Пі Морган», які заблакаваў грашовы перавод амбасады Расеі ў Казахстане.

Дзярждума перасцерагае ПАРЕ ад пазбаўлення паўнамоцтваў расейскай дэлегацыі і разрыву міжпарламенцкага дыялогу з Расеяй.

NATO прыпыніла «ўвесь комплекс вайсковага і грамадзянскага практычнага супрацоўніцтва з Расеяй».

Улады ЗША дэ-факта спынілі перамовы наконт пагаднення аб абмене падатковай інфармацыяй паводле правіл FATCA, закона аб падаткаабкладанні замежных рахункаў амерыканскіх рэзідэнтаў.

Масавыя скарачэнні ўжо пачаліся на заводзе Ford у Ленінградскай вобласці. Сваіх месцаў пазбавіцца прыкладна чвэрць супрацоўнікаў прадпрыемства. На адназменны рэжым таксама пяройдуць прадпрыемствы ў Татарстане. Тое ж без сумневу закране калі не ўсіх, то большасць прадпрыемстваў, якія працуюць у Расеі ў якасці філіялаў амерыканскіх і заходнееўрапейскіх фірмаў.

«Віза» заблакавала крэдытныя карты банка «Расея», які належыць сябру Пуціна Кавальчуку - у якасці першага кроку да поўнай ізаляцыі банкаўскай сістэмы Расеі ў выпадку нападу на Украіну.

Палата прадстаўнікоў амерыканскага Кангрэса прыняла законапраект аб санкцыях супраць Расеі. Законапраект прапануе замарозіць актывы і забараніць уезд асобам, якія падрываюць суверэнітэт і тэрытарыяльную цэласнасць Украіны.

НАСА аб'явіла аб прыпыненні ўсіх кантактаў з Раскосмасам за выключэннем забеспячэння работы касмічнай станцыі, а таксама спыненні запрашэння на якія-небудзь канферэнцыі, якія праводзяцца пры ўдзеле НАСА і расейскіх удзельнікаў.

Відавочна, на чарзе блакада і іншых навуковых і тэхналагічных кантактаў з Расеяй. Што з майго пункту гледжання - паколькі ў мяне, само сабой зразумела, мноства сяброў-навукоўцаў у Расеі, людзей выдатных і да палітыкі Пуціна недатычных - было б аб'ектыўна сумна.

Вызначаюцца - наколькі можна меркаваць з выступаў на мітынгах і гутарак - і няўрадавыя процідзеянні антыўкраінскай істэрыі ў Расеі. Амерыканскія ўкраінцы - і не толькі ўкраінцы, але і спачуваючыя Украіне амерыканцы - маюць намер арганізаваць байкот дзеячаў мастацтва, якія падпісалі ліст у падтрымку далучэння Крыму падчас іх выступаў у Амерыцы і Еўропе.

Падобнае на той, які меў месца ў бытнасць Лігі абароны габрэяў (калі пратэсты падчас выступаў расейскіх музыкаў, танцораў, спевакоў, аркестраў і тэатраў нармальна выступаць не давалі - а залы ў выніку байкоту гледачамі былі напоўпустыя).

І вось зараз усе гэтыя дзеячы мастацтва, якіх (кажучы паміж намі) падпісваць гэты ліст ніхто не цягнуў, не час Сталіна ўсё ж такі, будуць падвяргацца абструкцыям, падобным тым, якім Ліга абароны габрэяў падвяргала савецкіх артыстаў у той час, калі Савецкі Саюз змагаўся з «апантанымі ізраільскімі акупантамі».

Украіна раптам стала такім жа метафізічным ворагам Расеі, якім у Савецкай Краіне былі габрэі. Дзеянні Лігі абароны ўкраінцаў супраць расейскіх артыстаў, якія падпісалі ліст у падтрымку далучэння Крыму, могуць апынуцца падчас еўрапейскіх і амерыканскіх гастролей артыстаў, якія падтрымліваюць акупацыю Крыму, вельмі балючыя і для падпісантаў ліста, і для прэстыжу Расеі. Асабліва, калі пра гэтыя пратэсты будзе пісаць сусветная прэса, і яны будуць паказвацца па тэлебачанні і распаўсюджвацца ў інтэрнэце.

Але што яшчэ больш жахае, так гэта настрой на чалавечым узроўні, які паводзіны ашалелага Пуціна і яго атачэння хутка змяняюць. Расейская мову з мовы Пушкіна, Чэхава, Дастаеўскага на вачах становіцца мовай ворагаў (як было ў часы халоднай вайны). Мовай, пра якую амерыканцы і еўрапейцы маглі б сказаць (трохі перафразуючы Маякоўскага): «Калі б я быў хоць лекарам, хоць нью-ёркскім мянтом - і то з адчуваннем жудасці я б расейскую НЕ вывучыў толькі за тое, што на ёй размаўляў Пуцін».

У Нью-Ёрку сотні тысяч украінцаў, у Канадзе і Заходняй Еўропе многія мільёны. Я з жахам чытаю і чую (а не чуць папросту немагчыма) заклікі запісвацца ва ўкраінскае войска добраахвотнікамі каб, у выпадку пуцінскага ўварвання, абараняць Украіну. А таксама рыхтавацца да партызанскай вайны.

Так-так, менавіта да партызанскай вайны ў выпадку ўварвання Пуціна ў кірунку Харкава, Кіева, Мікалаева..Партызанскія арміі ў час Вялікай Айчыннай Вайны былі ва Украіне і Беларусі, і як ні дзіўна, не ў Расеі як такой. Дзядулі, якія былі партызанамі, вучаць унукаў таму, што...страшна і казаць. Як ператварыць кожную хату ў кожнай вёсцы ў крэпасць, як рабіць выбухоўку, як хаваць стрэльбы ў дровах і свіранах...

І гэтыя размовы сярод украінцаў, якіх у Нью-Ёрку мноства, чуеш усюды. Нават у маёй мамы дома - паколькі ёй, вельмі немаладой жанчыне, днём дапамагае ўкраінка, якая цэлымі днямі гаворыць з сябрамі і сваякамі ва ўсім свеце па тэлефоне даволі гучна.

Падобнымі настроямі напоўнены і інтэрнэт. Ці можна такое было сабе ўявіць яшчэ ўсяго толькі месяц таму? Вось да чаго давёў Федэрацыю яе прэзідэнт. Які жыве - паводле вызначэння Меркель - у іншым свеце. З паніжаным пачуццём небяспекі (аб якім у біяграфіі Пуціна гаворыцца, як пра годнасць), закладнікам якога робіць усю Расею. А з ёю і ўсё чалавецтва - паколькі ў яго руках чырвоныя кнопкі і зялёныя чалавечкі.

Які падтрымліваецца на восемдзесят адсоткаў (калі верыць пуцінскай жа статыстыцы) расейскім народам. Які не ведае, што творыць і што вытварае.

Не ведае, пакуль не будзе бачыць.

Юрый Магаршак, «Эхо Москвы»