У Харкаве пабіліся мітынгоўцы
2- 6.04.2014, 17:37
- 13,183
У Харкаве ля тэатра імя Шаўчэнкі адбылася бойка паміж прарасейскімі мітынгоўцамі і, верагодна, актывістамі «Правага сектару».
Падчас сутыкнення ў паветра ляцелі петарды, былі чутны таксама некалькі выбухаў.
Дзве групы людзей, падзеленыя кардонам міліцыі, кідалі адзін у аднаго пластыкавыя бутэлькі і палкі.
Сутыкненне адбылося пасля таго, як да ўдзельнікаў прарасейскага маршу, якія знаходзіліся ля помніка Шаўчэнку, падбеглі два чалавекі і крыкнулі, што ўнізе знаходзяцца актывісты «Правага сектару».
Пасля гэтага калона рушыла ў бок тэатра, дзе і адбылося сутыкненне.
Як стала вядома пазней, сепаратысты кідалі ў актывістаў Еўрамайдану выбуховыя пакеты і камяні. З боку завулка ад вуліцы Рымарскай праваахоўнікі падагналі канвойны аўтамабіль, куды з дапамогай супрацоўнікаў спецпадраздзялення «Грыфон» з цяжкасцю завялі прыхільнікаў Еўрамайдану.
Аднак антымайданаўцы заблакавалі канвойны аўтамабіль і пачалі яго разгойдваць. Да месца падзей прыбылі некалькі дзясяткаў міліцыянтаў у поўным рыштунку, у некаторых з іх ёсць помпавая зброя.
Як вядома, у Харкаве ля помніка Шаўчэнку ў Харкаве праходзіла антываеннае веча і рок-канцэрт «Левабярэжны рок-2» у падтрымку цэласнасці Украіны.
Разам з тым, на плошчы Свабоды сабралася некалькі тысяч чалавек, якія стаялі з прарасейскімі сцягамі.
Таксама стаялі людзі са сцягамі КПУ, Расеі і Імперскай Расеі. Гэтыя актывісты сцвярджалі, што яны за далучэнне да Мытнага саюза, за саюз Украіны з Беларуссю.