За правалам правал

Цалкам заваліўшы бягучую пяцігодку, Лукашэнка пачаў планаваць наступную.

У 2016-2020 гады штогадовы рост ВУП можа скласці ад 3% да 6%. Паводле звестак БелаПАН, такая ацэнка прыводзіцца ў канцэпцыі развіцця навукі і эканомікі, якую падрыхтавалі дзяржорганы.

"Валавы ўнутраны прадукт Беларусі прадугледжваецца павялічыць у 2020 годзе ў параўнанні з 2015 годам з улікам розных сцэнароў развіцця ў 1,18-1,34 разы, забяспечваючы сярэднегадавыя тэмпы яго прыросту на ўзроўні 3-6%", - гаворыцца ў дакуменце "Беларусь-2020: навука і эканоміка".

Пры гэтым аўтары канцэпцыі падкрэсліваюць: "зыходзячы з неабходнасці павышэння якасці і эфектыўнасці фактараў, якія фармуюць вытворчасць" закладваць на наступную пяцігодку больш высокія тэмпы эканамічнага росту нацыянальнай эканомікі неапраўдана.

У перыяд да 2020 года "неабходна сканцэнтравацца на ўнутраных крыніцах канкурэнтаздольнасці і эканамічнага росту, базай якіх з'яўляецца навукова-тэхнічны прагрэс", лічаць аўтары канцэпцыі.

Падрыхтаваная канцэпцыя абмяркоўвалася тыдзень таму, 31 сакавіка, на нарадзе з удзелам кіраўніка дзяржавы. Выступаючы перад навукоўцамі, Лукашэнка даручыў выкарыстоўваць падыходы, закладзеныя ў канцэпцыі, пры падрыхтоўцы Праграмы сацыяльна-эканамічнага развіцця на 2016-2020 гады.

"Лічу, што закладзеныя ў ёй ідэі і падыходы мэтазгодна выкарыстоўваць пры падрыхтоўцы Праграмы сацыяльна-эканамічнага развіцця Рэспублікі Беларусь на наступную пяцігодку", - сказаў Лукашэнка.

Праграма сацыяльна-эканамічнага развіцця на 2011-2015 гады, прынятая ў 2010 годзе, прадугледжвала, што за пяцігодку ВУП Беларусі вырасце на 62-68% (пры сярэднегадавых тэмпах росту звыш 10%). Аднак фактычныя тэмпы эканамічнага росту апынуліся нашмат ніжэй. Так, у 2011 годзе ВУП Беларусі вырас на 5,5%, у 2012-м - на 1,7%, у 2013-м - на 0,9%. За два месяцы 2014 года ён скараціўся на 1,1%.