Генадзь Кернэс: Ніякіх «рэферэндумаў» у Харкаве не будзе
6- 7.04.2014, 13:19
- 11,749
Мэр Харкава заявіў, што пытанне аб правядзенні «рэферэндуму» нават не абмяркоўваецца.
Пра гэта Генадзь Кернэс заявіў, знаходзячыся ў будынку абласной адміністрацыі, захопленай узброенымі прарасейскімі баявікамі, перадае УНІАН.
«Калі ёсць у кагосьці сепаратысцкія настроі, я гэтым людзям патлумачыў: Ніякіх рэферэндумаў, таму, што няма закона. Ніякіх іншых пытанняў ніхто з імі абмяркоўваць не будзе», - заявіў ён.
Кернэс таксама адзначыў, што людзі, якія захапілі будынак, патрабавалі падрабязнай справаздачы аб забойствах на Рымарскай двух маладых людзей з 14 на 15 сакавіка. Ён адзначыў, што з імі будуць казаць толькі пра ход расследавання забойстваў на Рымарскай. Пытанні аб рэферэндуме, аб пазачарговай сесіі абмяркоўвацца не будуць.
Гэтую інфармацыю пацвердзіў кіраўнік Харкаўскай аблдзяржадміністрацыі Ігар Балута, які таксама знаходзіцца ў будынку.
Адказваючы на пытанне журналістаў, чаму людзі, якія захапілі будынак, усталявалі на шпілі сцяг РФ, Кернэс заявіў: «Сярод любога натоўпу ёсць людзі, у якіх ёсць, можа быць, свае задачы. Давайце мы не будзем павялічваць напал запалу, давайце зробім усё, каб урэгуляваць тое, што зараз адбываецца».
На плошчы Свабоды ў Харкаве сёння праходзіць два мітынгі: за далучэнне да Расеі і супраць сепаратызму.
6 красавіка на ўсходзе Украіны прайшлі сепаратысцкія правакацыі. У прыватнасці, прарасейскія актывісты захапілі абласныя адміністрацыі ў Данецку і Харкаве. У Луганску штурмам узялі СБУ і захапілі філіял Нацбанка. Таксама быў захоплены будынак СБУ і ў Данецку.