Станіслаў Шушкевіч: У Беларусі быў свой Майдан 19 снежня 2010 года

На акцыі пратэсту ў Менску выходзіла не менш людзей, чым у Кіеве.

Апошні старшыня беларускага парламента, абраны на гэту пасаду шляхам свабодных выбараў, у Вільні бярэ ўдзел у канферэнцыі старшыняў парламентаў краін ЕЗ. На яе запрошаныя і члены парламентаў краін Усходняга партнёрства, піша ru.delfi.lt.

Па словах Шушкевіча, Беларусь абвінавачваюць у тым, што ў ёй няма такога Майдана з прысутнымі, як ва Украіне. "Паважаныя калегі, 19 снежня 2010 года наш Майдан быў на праспекце Незалежнасці і плошчы Незалежнасці ў Менску. Там было 40 000-70 000 чалавек, гэта больш чым калі-небудзь збіралася на Майдане, але тых, хто пратэставаў супраць фальсіфікацыі выбараў, жорстка разагналі", - сказаў Шушкевіч.

Паводле яго слоў, перад гэтым дыктатар Лукашэнка сабраў увесь беларускі АМАП, і той бессаромна біў усіх пратэстоўцаў, тысячы былі затрыманыя. У ліку затрыманых было сямёра кандыдатаў у прэзідэнты. Адзін кандыдат да гэтага часу знаходзіцца ў турме.

"Арганізатары Усходняга партнёрства не маглі ўявіць, што наша дзяржава можа быць такой антынароднай і антыдзяржаўнай. Наш прэзідэнт з паліталогіі засвоіў толькі адно: усе дзеянні трэба адхіліць, калі хочаш захаваць і зацвердзіць сваю ўладу. Можна падумаць, што гэта Макіявелі: не, гэта не тое. Гэта, напрыклад, фізічнае знішчэнне канкурэнтаў, у першую чаргу - палітычных, іх заключэнне ў турму. Многія нашы грамадзяне ў турмах або ствараюць такія ўмовы, каб яны пакідалі Беларусь", - сказаў Шушкевіч.

Палітык сказаў, што беларусы нічым не адрозніваюцца ад іншых народаў: яны таксама еўрапейцы, але страцілі шмат людзей. "Генацыд беларускага народа - ясны факт - амерыканцы падчас Другой сусветнай вайны страцілі 420 000 сваіх салдат з 132 млн. жыхароў. Беларусь з 10 млн. жыхароў страціла 2,5 млн. жыхароў, у іх ліку вайскоўцаў больш чым ЗША. Акрамя таго, гэта былі лепшыя людзі. У такіх умовах вельмі складана аднавіць народ. Калі вы лічыце нас народам з генетычнымі парушэннямі, то мы гэта адновім", - сказаў Шушкевіч.

На яго думку, беларусы вернуцца ў Еўропу і пацвердзяць, што яны еўрапейцы. У Шушкевіча да еўрапейцаў адна просьба: не спрабаваць перавыхаваць Лукашэнку, што раней ЕЗ беспаспяхова спрабаваў рабіць.

Па словах Шушкевіча, у будучыні на лепшае спадзявацца дазваляе сітуацыя ў краінах былога СССР - у Літве, Латвіі, Эстоніі, а таксама ў Польшчы.

"З 1996 года ў нас не было ні парламенцкіх, ні прэзідэнцкіх выбараў - дакладней, былі мерапрыемствы, якія называлі выбарамі, але іх вынікі былі вядомыя яшчэ да падліку галасоў", - сказаў Шушкевіч. Міжнародныя назіральнікі неаднаразова адзначалі, што падліку галасоў у Беларусі не бывае - выбіраюць неабходных прадстаўнікоў улады.

Па словах Шушкевіча, хто ў Беларусі не падтрымлівае прэзідэнта - той "дурань і вінаваты ва ўсіх бедах". "Дэмакратыяй у Беларусі і не пахне, у нас шмат палітычных зняволеных, акрамя таго, ні адзін з іх не лічыцца палітычным зняволеным па афіцыйнай версіі беларускіх уладаў", - сказаў госць з Беларусі.

Шушкевіч пракаментаваў і сцвярджэнні прэзідэнта Расеі Уладзіміра Пуціна аб тым, што СССР распушчаны не зусім правільна з юрыдычнага пункту гледжання. Гэтую ідэю Пуціна Шушкевіч ацаніў, як "маразм". Паводле яго слоў, Расея кажа пра рэферэндум ад 17 сакавіка 1991 года аб захаванні СССР.

"Цяпер яны кажуць, што быў "рэферэндум" па Крыме і нельга парушаць прынятае на "рэферэндуме" рашэнне. Яны заўсёды знойдуць прычыну сказаць, што маюць рацыю і гэта прапагандуюць. СССР быў распушчаны юрыдычна правільна, фактычна ён спыніў сваё існаванне ў жніўні 1991 года, калі не атрымаўся путч. Таму, калі Міхаіл Гарбачоў не кіраваў саюзам і дзяржструктурамі, структуры самі не кіравалі саюзам, знікалі грошы. Сістэма была некіравальнай", - сказаў Шушкевіч.

Ён нагадаў, што ў 1991 годзе ў Белавежскай пушчы пагадненне падпісалі ўсе заснавальнікі былога СССР: Расея, Украіна і Беларусь. Нават Расейская Дума ў 1996 годзе дэнансавала пагадненне аб стварэнні СССР, а пазней зразумела, што зрабіла глупства і стала даказваць, што гэта не мае палітычных наступстваў.

"Усе ваганні расейскай улады, у тым ліку і самога Пуціна - гэта толькі якасці шпіёна, а не кіраўніка дзяржавы", - абагульніў Шушкевіч.