Беларусь - лідар візавага рэйтынгу ЕЗ

Колькасць выдадзеных у Беларусі шэнгенскіх віз павялічылася да 772 тысяч.

Гэта значыць, выдадзена амаль на 70 тысяч візаў больш, чым годам раней, пішуць «Беларускія навіны».

Большую колькасць шэнгенскіх віз, чым у Беларусі, консульствы шэнгенскіх краін выдаюць толькі ў Расеі, Украіне і Кітаі. Прычым на Расею, Украіну і Беларусь, разам узятыя, прыходзіцца амаль 57% (9,2 млн візаў) ад усіх выдадзеных у свеце шэнгенскіх візаў (16,3 млн).

Пры гэтым паводле ліку шэнгенскіх візаў на душу насельніцтва Беларусь па-ранейшаму захоўвае першынство сярод усіх краін, якія маюць візавы рэжым (а такіх прыкладна 140) з Еўразвязам - амаль 80 шэнгенскіх візаў на 1000 жыхароў! Для параўнання, у Расеі гэты паказчык - блізу 48, ва Украіне - 34. Праўда, пры даволі добрым паказчыку шматразовых візаў (каля паловы ад усіх выдадзеных), дзель шматразовых візаў з тэрмінам дзеяння год і больш у Беларусі па-ранейшаму пакідае жадаць лепшага.

Дынаміка выдадзеных кароткатэрміновых візаў консульствамі краін ЕЗ у Беларусі, тыс.

Паказчык адмоваў у візе - адзін з лепшых у свеце

Удакладненыя звесткі (статыстычны файл, які распаўсюджваецца Еўракамісіяй, утрымлівае шэраг памылак у інфармацыі паводле візаў, выдадзеных консульствам Нямеччыны) паказваюць, што ў Беларусі, як і раней, найменшы ў рэгіёне адсотак адмоваў у шэнгенскай візе. У 2013 годзе ён склаў каля 0,5%, пры гэтым у Расеі - 1%, ва Украіне - 1,9%, у Малдове - 4,8%.

Гэта не проста найлепшы паказчык у рэгіёне, а адзін з самых лепшых паказчыкаў сярод усіх краін, якія маюць візавы рэжым з ЕЗ. І гэта значыць, што ў сваёй абсалютнай большасці беларусы добрасумленна выконваюць візавае і міграцыйнае заканадаўства краін Еўразвязу, таму і ганаруюцца высокай ступені даверу з боку консульскіх устаноў.

Самыя ліберальныя - консульствы Польшчы і Італіі

Як і ў папярэднія гады, консульства Польшчы ў Менску, Гародні і Берасці, а таксама італійскае консульства ў Менску - самыя ліберальныя з пункту гледжання дзелі шматразовых візаў ад агульнай колькасці выдадзеных і надзвычай малой дзелі адмоваў у візе агулам.

Неверагодна, але, згодна са звесткамі органаў ЕЗ, у 2013 годзе польскае консульства ў Берасці наогул не адмовіла ў візе нікому з 83 658, якiя запатрабавалі яе. Пры гэтым 70,4% выдадзеных консульствам віз былі шматразовымі.

Цікава, што тры іншыя дзяржавы «Вышаградскай чацвёркі» (Чэхія, Славаччына і Вугоршчына) згодна з дзеллю шматразовых віз, наадварот, знаходзяцца ў ліку аўтсайдэраў сярод консульстваў краін Шэнгена, якія працуюць у Беларусі. Пры сярэднім паказчыку дзелі шматразовых віз ва ўсіх шэнгенскіх амбасадах 45,7%, прыкладна кожная дзясятая атрыманая ў чэшскім або вугорскім консульстве ў Менску віза - шматразовая.

Такім чынам, да гэтага часу, нягледзячы на сапраўдны для ўсіх консульстваў Шэнгена Візавы кодэкс ЕЗ, захоўваюцца ашаламляльныя адрозненні ў візавай палітыцы дзяржаў.

Дзель выдадзеных шматразовых віз у некаторых консульствах краін Шэнгена, 2013 год, %

Чэшскае консульства ў чарговы раз пацвердзіла свой статус самай «жорсткай» сярод усіх, якія функцыянуюць у Беларусі, консульскіх устаноў краін Шэнгена. Зрэшты, у Расеі і Украіне чэшскае консульства таксама знаходзіцца ў шэрагу самых «непрыязных». Так што лічбы паводле Беларусі - не паказчык прадузятага стаўлення Чэхіі да беларускіх заяўнікаў, а адлюстраванне агулам жорсткай міграцыйнай і візавай палітыкі Прагі.

Павелічэнне колькасці віз - за кошт балтыйскіх краін

Польскія консульствы выдалі ў 2013 годзе шэнгенскіх віз на 20 тысяч менш, чым у 2012 годзе. Варшава ўжо які год безвынікова просіць беларускую старану дазволіць павялічыць свой консульскі штат, каб лепш спраўляцца з патокам беларускіх візавых заяўнікаў.

Статыстычныя звесткі паказваюць, што такія просьбы зусім небеспадстаўныя, бо консульствы, якія абслугоўваюць яшчэ і прэтэндэнтаў на «карту паляка», працуюць на мяжы сваіх магчымасцяў.

Зрэшты, консульскія ўстановы Польшчы ўсё роўна выдаюць больш шэнгенскіх візаў, чым консульствы любой іншай краіны ЕЗ, а менавіта 35% ад агульнай колькасці выдадзеных у Беларусі шэнгенскіх візаў (Літва - каля 30%).

У адрозненне ад Польшчы, усе іншыя шэнгенскія консульствы, якія працуюць у Беларусі, павялічылі ў 2013 годзе колькасць выдадзеных візаў. Аднак такое павелічэнне толькі кампенсавала б 20-і тысячны спад у колькасці выдадзеных шэнгенскіх віз Польшчай, калі б не консульскія ўстановы балтыйскіх дзяржаў.

У 2013 годзе консульствы Літвы, Латвіі і Эстоніі рэзка павялічылі колькасць выдадзеных шэнгенскіх візаў у Беларусі - на 72 тысячы шэнгенскіх візаў больш, чым годам раней.

У абсалютным выражэнні больш за астатніх павялічыла выдачу візаў літоўскае консульства ў Менску (на 33,5 тысячы). Гэта самае буйное консульства ў Беларусі. А ў адносным выражэнні самы значны рывок зрабіла латвійскае консульства ў Віцебску, павялічыўшы колькасць выдадзеных візаў у 2,4 разы! Калі ў 2011 годзе консульства выдала каля 7,7 тысяч візаў, у 2012-м - 9,2 тыс., то ў 2013-м - ужо 21,9 тыс.

Колькасць жа выдадзеных у 2013 годзе візаў консульствамі Латвіі і Эстоніі ў Менску павялічылася ў паўтара разы.