Сэпаратысты спрабавалі праткнуцца ў адміністрацыю Харкава
9- 8.04.2014, 21:31
- 54,660
Мітынг прарасейскіх актывістаў доўжыцца пад будынкам Харкаўскай аблдзяржадміністрацыі.
У ім бярэ ўдзел больш за тысячу чалавек. Кардон міліцыі стаіць не паўколам каля ўваходу ў адміністрацыю, як гэта было раней, а шэрагам на ходніку ўздоўж праезнай часткі, мітынгоўцы займаюць праезную частку вуліцы Сумскай, паведамляе SQ.
Да старых патрабаванням мітынгоўцаў - аб правядзенні ў вобласці рэфэрэндуму аб фэдэралізацыі - дадалося патрабаванне аб вызваленні затрыманых уночы актывістаў.
Група прыблізна з 200 чалавек кінулася з плошчы Свабоды да варот абладміністрацыі з боку вуліцы Міраносіцкай, аднак іх паспелі зачыніць. Яны скандавалі «Расея», «Харкаў - расейскі горад», «Фашысты». Зброі ў руках нападнікаў не было, на некаторых з іх - маскі.
Сур'ёзнай спробы штурму варот не было, некалькі актывістаў пачалі расхістваць чыгунны сэгмэнт агароджы, каб выцягнуць яе з забетанаванай апоры, аднак неўзабаве пакінулі гэта рабіць.
Нагадаем, сёння поначы ў выніку антытэрарыстычнай аперацыі сіламі МУС у Харкаве цалкам зачышчаны ад сэпаратыстаў захоплены і падпалены будынак абласной дзяржаўнай адміністрацыі. Затрымана блізу 70 чалавек, якія падазраюцца ў супрацьпраўных дзеяннях, звязаных з сэпаратызмам, арганізацыяй масавых беспарадкаў, прычыненнем шкоды здароўю людзей і парушэннем яшчэ цэлага шэрагу артыкулаў.