Арыштаваны намеснік дырэктара «Белдзяржпаляванне»

Чыноўніка вінавацяць у атрыманні хабараў.

Кіраваннем Следчага камітэта ў Менску распачата крымінальная справа ў дачыненні да намесніка дырэктара РУП "Белдзяржпаляванне", які ўзначальвае аддзел выдачы дзяржаўных пасведчанняў на права палявання.

"Намеснік кіраўніка прадпрыемства падазраецца ў хабарніцтве", - паведамілі агенцтву "Інтэрфакс-Захад" у чацвер у аддзеле інфармацыі і сувязі з грамадскасцю СК.

Следствам выяўлена, што названая службовая асоба пры дапамозе яшчэ дзвюх асоб прыняла незаконнае грашовае ўзнагароджанне ў памеры $ 250 за спрыяльнае вырашэнне пытання, звязанага са здачай спецыяльнага паляўнічага экзамена для атрымання дзяржаўнага пасведчання на права палявання.

Падчас ператрусаў у падазраваных канфіскаваныя грашовыя сродкі ў суме больш за $ 6 тыс., накладзены арышт на маёмасць, у тым ліку два аўтамабіля.

"Праводзяцца следчыя дзеянні, накіраваныя на выяўленне дадатковых эпізодаў злачыннай дзейнасці падазраваных, а таксама сістэматычнасці атрымання хабараў. Даследуюцца прычыны і ўмовы, якія спрыялі ўчыненню злачынства", - праінфармавалі ў СК.

Дзеянні затрыманых кваліфікаваныя следствам паводле ч.1 арт. 430 (Атрыманне хабару) і ч.6 арт.16, ч. 1 арт. 430 (дапамога ў атрыманні хабару) Крымінальнага кодэкса Рэспублікі Беларусь.

Да ўсіх падазраваных прымененая мера стрымання ў выглядзе змяшчэння пад варту.