Аляксандр Дабравольскі: Навадворскую паважалі нават ворагі

Валерыя Навадворская прыцягвала ўсеагульную ўвагу, незалежна ад палітычнай прыналежнасці навакольных.

Пра гэта «Радыё Свабода» заявіў беларускі палітык Аляксандр Дабравольскі.

«Я думаю, што Валерыя Навадворская - гэта сама па сабе незвычайная з'ява, - сказаў ён. - Гэта вельмі разумная жанчына, якая ніколі не лавіравала, а заўсёды казала праўду - так, як яна і думала. Над ёй часам здзекаваліся, з ёй не згаджаліся, але ў душы, я ўпэўнены, яе паважалі. Бо чалавека такога маштабу, які кажа праўду, а не выкручваецца, ні пад што і ні пад каго не падладжваецца, у наш час цяжка знайсці ўвогуле. Адпаведна, гэта вялікая страта для ўсіх.

Наогул Валерыю Навадворскую можна лічыць сапраўдным, узорным дэмакратам. Гэта чалавек, які за народ, а не за ўладу, за людзей, а не за дзяржаву. Нават калі ўласная дзяржава памылялася, яна не саромелася пра гэта казаць адкрыта. І вось такіх людзей нават у велізарнай Расеі, сапраўды, вельмі мала. Такіх людзей можна пералічыць, я думаю, адзінкамі, нават не дзясяткамі».