Дырэктарка гомельскай фабрыкі пазычыла ў яе 1,7 млрд на 15 гадоў пад 1%

КДК прапанаваў канцэрну «Беллегпрам» вызваліць ад пасады дырэктара гомельскага трыкатажнага прадпрыемства.

Прычына - кватэрнае пытанне. За апошнія чатыры гады кіраўніца двойчы развязвала яго за кошт выгадных пазык у фабрыкі, якой у той жа час даводзілася браць дарагія крэдыты для дзейнасці, піша «Советская Белоруссия».

На кіруючую пасаду гэтая спецыялістка прыйшла ў 2005 годзе, а ў 2009-м новаму дырэктару фабрыка дапамагла пабудаваць 3-пакаёвую кватэру ў абласным цэнтры. Назіральны савет акцыянернага таварыства, ільвіная дзель акцый якога належыць дзяржаве, не пярэчыў супраць вылучэння 50 тысяч даляраў у эквіваленце для развязання жыллёвай праблемы.

Аднак ужо ў 2012 годзе кіраўніца зноў звярнулася за дапамогай да фабрыкі. На гэты раз дырэктару спатрэбілася пазыка ў 1,7 мільярда рублёў на спажывецкія патрэбы на 15 гадоў пад 1% ад сумы без пераліку на ўвесь тэрмін карыстання. І назіральны савет даў дабро, не ўнікаючы ў падрабязнасці. Кантралёры, аднак, высветлілі, для чаго спатрэбіліся такія грошы, якія наўпрост апустошвалі казну прадпрыемства:

- Фактычна гэтая пазыка прызначалася для пакупкі ў Гомелі катэджа плошчай каля 250 квадратных метраў і коштам 2 мільярды рублёў, хоць на той момант кіраўніца ўжо не мела патрэбы ў жыллі. З лістапада 2012 г. да жніўня 2013 г. фабрыка, выконваючы дамову пазыкі, рэгулярна пералічвала дырэктару буйныя сумы на яе разліковы рахунак. У той жа час само прадпрыемства, не маючы ў дастатковым аб'ёме ўласных абаротных сродкаў, вымушана было браць крэдыты пад высокія адсоткі нават на выдачу зарплаты.

З пункту гледжання простых жыццёвых інтарэсаў такая бухгалтэрыя выглядае цалкам зразумелай, а вось з пункту гледжання эканомікі кіравання і этыкі - больш чым дзіўнай. Дзяржкантроль вобласці адназначна ацаніў дырэктарскія марнаванні як дадатковыя выдаткі фабрыкі ў памеры 1,9 мільярда рублёў. Матэрыялы для разбору накіраваны ў фінансавую міліцыю, а ў канцэрн «Беллегпрам» - прапанова аб прынцыповым развязанні кадравага пытання.