Трэнер зборнай Нямеччыны: Мы пераможам, калі атрымаецца паказаць свой футбол
- 13.07.2014, 14:52
- 7,338
Нямеччына можа стаць першай еўрапейскай краінай, якая перамагла на чэмпіянаце свету ў футболе ў Паўднёвай Амерыцы.
Пра гэта заявіў галоўны трэнер нямецкай зборнай Ёахім Лёў, паведамляе РІА «Новости».
«Я нічога не баюся. Я ведаю, што гэта будзе матч паміж двума камандамі, супрацьстаянне якіх склалася гістарычна. Самае важнае - хто пераможа. Мы ведаем, што можам стаць першай еўрапейскай камандай, якой удалося перамагчы ў турніры ў Паўднёвай Амерыцы Гэта дадасць нам радасці , калі мы пераможам», - сказаў ён.
Зборныя Нямеччыны і Аргенціны абсалютна па-рознаму пераадолелі стадыю паўфіналу. Бундэстым прадэманстравала галявую феерыю, не пакінуўшы каменя на камяні ад гаспадароў турніру. Каманда Лёва разграміла гаспадароў турніру бразільцаў з лікам 07:01. Да таго ж немцы, у адрозненне ад Аргенціны, свой паўфінал згулялі на дзень раней і мелі крыху больш часу на аднаўленне. Галоўны трэнер немцаў падкрэсліў, што не варта чакаць у матчы з Аргенцінай паўтарэння сцэнару паўфіналу супраць бразільцаў.
«Заўтра будзе вельмі цяжка. Матч з Бразіліяй не паўторыцца. У нас ёсць неабходная ўпэўненасць у сабе. Мы паважаем спаборніка, але я мяркую, што калі нам удасца паказаць свой футбол, то мы пераможам» - сказаў на перадматчавай прэс-канферэнцыі Лёў . - Я б не сказаў, што заўтрашні матч - самы цяжкі выклік у маёй кар'еры. У мяне бывалі важныя матчы, але мы павінны разумець, што жыццё працягваецца пасля кожнага з іх. Вядома, мы будзем засмучаныя, калі саступім заўтра, але ў гэтай каманды і ў нямецкага футбола ёсць будучыня».
Матч Нямеччына-Аргенціна пачнецца сёння а 22:00 паводле менскага часу. Ён будзе транслявацца на тэлеканале «Беларусь 2».