Крамлёўскі канал: Украінскі самалёт парушыў мяжу Расеі

Украіну абвінавачваюць у парушэнні паветранай прасторы Расеі.

Пра гэта абвясціў спецыяльны карэспандэнт пракрамлёўскага тэлеканала «Зорка» Максім Грыцэнка. НЗ, з ягоных слоў, адбылося каля памежнага горада Данецк у Растоўскай вобласці. Прадстаўнік урада вобласці, таксама «які бачыў» знішчальнік, мяркуе, што той лётаў над Украінай, паведамляе ІТАР-ТАСС.

«Мы прыехалі сёння ў першай палове дня ў прыгарад Данецка. І вось падчас здымак, у той час як тут працаваў следчы камітэт, у гэты момант над прыгарадам Данецка, заходзячы на расейскую тэрыторыю, з'явіўся ўкраінскі самалёт і ва ўсіх на вачах нанёс авіяўдар, мяркуючы па ўсім, па тэрыторыі Украіны. Усе людзі былі напалоханыя, яны разбегліся», - кажа Грыцэнка.

Інфармацыйны партал горада Каменск-Шахцінскі ПІК паведамляе, што над горадам лёталі адразу два самалёты ўкраінскіх ВВС. Паводле звестак выдання, лёталі яны «над галовамі жыхароў і здымачных груп», так што варта чакаць відэасведчанні добрай якасці.

Следчыя ў Данецку высвятляюць абставіны траплення снарада ў двор прыватнага жылога дома, у выніку чаго адзін грамадзянін РФ загінуў, двое іншых атрымалі раненні.

Раней аб украінскім вайсковым самалёце ў інтэрв'ю «Інтэрфаксу» згадваў прадстаўнік урада Растоўскай вобласці Аляксандр Цітоў. Ён казаў: «У той час, пакуль мы знаходзіліся на тэрыторыі Данецка, мы бачылі, як над тэрыторыяй Украіны праляцеў знішчальнік, які выпусціў не менш за шэсць снарадаў».

Нагадаем, раней Расея ўжо вінаваціла Украіну ў абстрэле сваёй тэрыторыі. Доказаў дачынення да гэтага ўкраінскіх сілавікоў Масква не дала. Не выключана, што абвінавачванні ў нібыта «абстрэлах», якія мелі месца, тэрыторыі РФ і парушэнні мяжы могуць быць выкарыстаны Крамлём для апраўдання ўварвання ва Украіну.