Арцемій Троіцкі: Баяцца і падлашчвацца перад Пуціным ганебна

Пасля збітага прарасейскімі тэрарыстамі «Боінга» Еўропа зменіць сваю рыторыку ў дачыненні да Расеі на больш жорсткую.

Подламу кіраўніцтву РФ пляваць на санкцыі, адзінае, што дапаможа спыніць агрэсію Крамля ва Украіне, - забарона прэзідэнту Пуціну з'яўляцца дзе-небудзь, акрамя Ірана і Венесуэлы, заявіў расейскі журналіст і актывіст Арцемій Троіцкі. Пра гэта піша сайт gordonua.com.

«Пасля таго жаху, які здарыўся з «Боінгам», Еўропа стане больш рашучай, ёй ужо будзе нязручна баяцца і падлашчвацца перад Пуціным, яна нарэшце зразумее, што гэта зусім ганебна. Думаю, тон размоў у дачыненні да Расеі дакладна зменіцца на больш жорсткі. Што тычыцца спынення фінансавання ўсякіх «ДНР» і «ЛНР», тут простымі эканамічнымі санкцыямі не дапаможаш, трэба ўжываць меры ў дачыненні да самога Пуціна і ягонага бліжэйшага акружэння», - перакананы Троіцкі.

Актывіст адзначае, што ўжыванне кропкавых санкцый будзе куды больш эфектыўным, чым заходнія абмежаванні на ўсю расейскую эканоміку.

«Я не прыхільнік шырокіх сектаральных санкцый у дачыненні да Расеі, паколькі ўсё подлае расейскае кіраўніцтва ўсё роўна знойдзе абыходныя шляхі. Пляваць яно хацела на санкцыі, ад якіх, па сутнасці, пакутуюць простыя рускія грамадзяне. Можа, многія звычайныя расейцы і дурні, таму што не разумеюць, да якой катастрофы іх Пуцін вядзе, і тым менш... Простых людзей шкада», - адзначыў Троіцкі.

Журналіст настойвае, што эфектыўны сродак супраць палітыкі Крамля - гэта калі лідары цывілізаваных краін зробяць Пуціна нерукападавальным.

«Калі з Пуціна зробяць хоць бы Лукашэнка, а яшчэ лепш - якога-небудзь паўночна-карэйскага лідара - і забароняць яму наогул дзе-небудзь паказвацца за межамі Ірана або Венесуэлы, такога роду санкцыі сапраўды займелі б дзеянне», - заявіў Троіцкі.

На думку журналіста, пасля трагедыі з самалётам малайзійскіх авіяліній Крэмль прыпыніць сваю агрэсіўную палітыку ў дачыненні да Украіны.

«Я даўно не аперую тэрмінамі «сумленныя, прыстойныя людзі» ў дачыненні да крамлёўскіх кіраўнікоў. Але калі б у Крамлі сядзелі хоць бы разумныя людзі, яны б не давялі сітуацыю да сённяшняга жахлівага тупіка. Думаю, пасля трагедыі з «Боінгам» Крэмль перастане ісці наперад без аглядкі, не вырашыцца на ва-банк, а рэальна прытармозіць сваю агрэсію ва Украіне», - падсумаваў Троіцкі.

Нагадаем, што раней Арцемій Троіцкі эміграваў у Эстонію.