Ryanair значна павялічыла квартальны прыбытак

Кампанія павялічыла чысты прыбытак у першым фінансавым квартале на 152%.

Ірландская Ryanair Holdings Plc, найбуйнейшы ў Еўропе авіяперавознік-дыскаўнтэр, павялічыла чысты прыбытак у першым фінансавым квартале на 152% дзякуючы істотнаму росту попыту на яе паслугі ў перыяд велікодных канікул, а таксама падвысіла прагноз на ўвесь фінансавы год і абвясціла аб выплаце спецыяльных дывідэндаў.

Яе чысты прыбытак у красавіку-чэрвені склаў 197 млн еўра ў параўнанні з 78 млн еўра за аналагічны перыяд годам раней, піша «Інтэрфакс».

Аналітыкі, апытаныя агенцтвам Bloomberg, у сярэднім прагназавалі гэты паказнік на ўзроўні 145 млн еўра.

Прыбытак Ryanair у мінулым квартале падскочыў на 11% - да 1,5 млрд еўра.

Сярэдні кошт квітка на маршрутах Ryanair вырас у I фінквартале на 9%, выдаткі зменшыліся на 2%.

Авіякампанія павялічыла прагноз прыбытку на гэты фінансавы год, які заканчваецца, у сакавіку 2015 года, да 620-650 млн еўра з чаканых у траўні 580-620 млн еўра. Ryanair разлічвае, што колькасць перавезеных ёю пасажыраў у гэтым годзе павялічыцца на 5% - да 86 млн.

Выдаткі без уліку паліва, як чакаецца, павысяцца ў гэтым фінансавым годзе на 4% (у траўні прагназаваўся ўздым на 3%).

Пры гэтым кампанія папярэдзіла аб «нулявой бачнасці» ў дачыненні да паказнікаў на другое фінансавае паўгоддзе.

Галоўны выканаўчы дырэктар Ryanair Майкл О'Ліры заявіў, што другое фінпаўгоддзе, магчыма, «будзе характарызавацца значна больш слабой коштавай кан'юнктурай, бо многія канкурэнты кампаніі зніжаюць кошты, часткова, у адказ на значныя аб'ёмы замоў квіткоў у Ryanair».

Кампанія мае намер выплаціць спецыяльныя дывідэнды ў суме 37,5 еўра на акцыю, агулам яна накіруе на гэтыя мэты 52 млн еўра.