Вялікабрытанія байкатуе Год культуры Расеі
7- 28.07.2014, 12:46
- 5,213
Лондан і Эдынбург адмовіліся ад актыўнай падтрымкі перакрыжаванага Года культуры Расеі і Вялікабрытаніі, што праходзіць цяпер.
Пра гэта піша ў нядзелю шатландская газета Herald Scotland, паведамляе РІА "Новости".
"Шатландскія і брытанскія міністры адмовіліся падтрымліваць гадавы культурны праект з Расеяй праз паводзіны супердзяржавы на Украіне. Урады больш не будуць падтрымліваць брытанска-расейскі год культуры, чальцы ўрада таксама байкатуюць імпрэзы, арганізаваныя ў рамках праграмы года", - гаворыцца ў публікацыі.
Выданне падае цытаты прадстаўнікоў шатландскага ўрада і МЗС Вялікабрытаніі з гэтай нагоды.
"Шатландскі ўрад больш не надае актыўнай падтрымкі крыжаванаму Году культуры Вялікабрытаніі і Расеі 2014, і місіс Хіслап (Фіёна Хіслап - міністр культуры Шатландыі) не будзе прысутнічаць ні на якіх расейскіх імпрэзах, якія пройдуць у Шатландыі ў рамках гэтай ініцыятывы. Культурныя акцыі, ужо запланаваныя ў Шатландыі ды Расеі, праходзяць паводле плану", - заявіла прадстаўніца шатландскага кабінета міністраў.
"У сувязі з незаконнай анэксіяй Крыма Расеяй, урад Яе Вялікасці адмовілася ад усялякай падтрымкі года культуры - як на ўзроўні ўрада, так і на ўзроўні высокапастаўленых афіцыйных асоб. Мы пераглядаем супрацоўніцтва з Расеяй у залежнасці ад кожнай падзеі", - сказаў у сваю чаргу прадстаўнік МЗС Вялікабрытаніі.