Яцэнюк патрабуе ад Рады прыняць праваленыя законапраекты

Прэм'ер-міністр Украіны патрабуе на пазачарговым пасяджэнні 31 ліпеня прыняць пакет законапраектаў аб мадэрнізацыі ГТС, бюджэце і зменах у Падатковы кодэкс.

У адваротным выпадку, кажа прэм'ер-міністр Арсеній Яцэнюк, сілы АТА застануцца без грошай, а Украіна - без крэдыту МВФ і Сусветнага банка. Пра гэта прэм'ер заявіў сёння на брыфінгу.

"Правал гэтых законаў цягне за сабой не толькі адсутнасць фінансавання ўкраінскіх Узброеных Сіл, а Міністэрства фінансаў Украіны выразна паведаміла, што з 1 жніўня нам няма чым плаціць заробак ВСУ, Нацгвардыі і ўсім, хто абараняе Украіну. Гэта не толькі адсутнасць сродкаў на аднаўленне інфраструктуры ўсходніх абласцей і на падтрымку наогул у цэлым Украіны, а яшчэ гэта зрыў нашай праграмы з Міжнародным валютным фондам і Сусветным банкам. У мяне была размова з дырэктарам-выканаўцам Сусветнага банка і МВФ, і менавіта таму хацеў бы заявіць наступнае: урад паўторна ўносіць у парламент усе законы, якія патрэбныя краіне", - сказаў Яцанюк, словы якога падае карэспандэнт ЛІГАБізнесІнформ.

Яцэнюк звярнуўся да чальцоў парламента з патрабаваннем, незалежна ад іх палітычных прыхільнасцяў і ахвоты перамагчы на наступных выбарах, прыйсці ў чацвер у Вярхоўную Раду і прагаласаваць за законы, патрэбныя ўкраінскай дзяржаве.

"Пазачарговая сесія парламента - першае. Усе дэпутаты ў залу Вярхоўнай Рады - другое. Галасаванне за ўсе законапраекты, якія ўнёс урад і якія адпавядаюць тым прапановам, якія ўносілі дэпутаты парламента - трэцяе. Прыняцце дзяржаўнага бюджэту, змяненні ў Падатковы кодэкс, зацвярджэнне пастаноў аб украінскай ГТС - гэта ключавыя рэчы, якія павінны быць у парадку дня Украіны. Калі мы гэта прымаем, у нас ёсць чым фінансаваць Узброеныя Сілы, за што аднаўляць Данецк і Луганск, як дапамагаць усёй Украіне агулам. І мы атрымліваем ад МВФ і Сусветнага банка 1,5 млрд даляраў ЗША. Калі мы гэта не прымаем, то мы гэта ўсё не атрымліваем. Таму маё катэгарычнае патрабаванне - прыйсці ў парламент і прагаласаваць. На іх рэйтынгі гэта ніяк не паўплывае", - сказаў ён.

Яцэнюк адмовіўся адказваць на пытанні журналістаў. На пытанне, ці пацвярджае ён сваю адстаўку, коратка адказаў: "Вы ўсё ўбачыце ў чацвер". Цяперашні статус Яцэнюка на пасадзе прэм'ера незразумелы - ці з'яўляецца ён выканаўцам абавязкаў ці дзейным прэм'ерам. Хутчэй за ўсё, Яцэнюк звязвае сваю будучыню на пасадзе прэм'ера з галасаваннем у чацвер - калі законапраекты не будуць падтрыманыя, хутчэй за ўсё, прэм'ер пакіне сваю пасаду.

Нагадаем, на мінулым тыдні Рада адмовілася галасаваць за ўрадавыя законапраекты, пасля чаго Яцэнюк заявіў аб сваёй адстаўцы.