Hubble знайшоў у Сусвеце самую далёкую галактыку-лінзу

Астраномы NASA зрабілі чарговае неверагоднае адкрыццё.

Пры дапамозе тэлескопа Hubble яны выявілі галактыку, якая мае рэдкі візуальны эфект гравітацыйнай лінзы, гаворыцца ў паведамленні на сайце арганізацыі, піша NEWSru.com.

Гэтая галактыка знаходзіцца за 9,6 млрд светлавых гадоў ад Зямлі і з'яўляецца самай далёкай з усіх такіх галактык, вядомых на сёння. Сваю незвычайную ўласцівасць яна атрымала дзякуючы велізарнай масе, праз якую святло, што выпраменьваецца ад змешчаных паблізу аб'ектаў, скрыўляецца і павялічваецца.

Гэты эфект завецца гравітацыйным лінзаваннем. Са слоў астраномаў, такая з'ява назіраецца вельмі рэдка і спецыяльна выявіць такія галактыкі вельмі складана.

Між тым зробленае астраномамі адкрыццё мае велізарнае значэнне. З яго дапамогай навукоўцы разлічваюць зразумець, як мяняліся галактыкі з цягам часу. У прыватнасці, астраномаў цікавіць працэс змены масы цёмнай матэрыі ў розных галактыках.