Колькі палякі і беларусы трацяць на прадукты?

У 1994 годзе Беларусь і Польшча знаходзіліся прыкладна на адным узроўні.

Але потым нашы краіны пайшлі рознымі дарогамі. У рамках праекта «Беларусь-Польшча: праз 20 гадоў» «Салідарнасць» параўноўвае, каму жывецца лепш і весялей.

Серыя матэрыялаў прысвечана рэаліям суседняй краіны ў розных сферах - ад паходу ў краму да ўдзелу ў самакіраванні - і дапаможа зразумець, як змянілася жыццё ў Польшчы. Пачнём з прадуктаў.

Як ідуць справы з коштамі на прадукты, растлумачым на прыкладзе ўмоўнай тыповай сям'і Кавальскіх (адно з самых распаўсюджаных прозвішчаў у Польшчы). Пётр і Катажына з 6-гадовым сынам Янам жывуць у Варшаве. Пётр працуе ў невялікай фірме, Катажына - на дзяржслужбе. Іх сямейны бюджэт - 6 тысяч злотых у месяц (прыкладна 19,74 млн беларускіх рублёў). Такімі даходамі не надта ж пахвалішся, але і скардзіцца не даводзіцца.

За выдаткамі сочыць Катажына, і яе турбуе, што апошнім часам усё больш прыходзіцца траціць на прадукты - кожны чацвёрты злоты з сямейнага бюджэту. Сёння пасля працы яны выбіраюцца «на закупы» ў бліжэйшы гіпермаркет. Там кошты ніжэйшыя, а загадзя падрыхтаваны спіс дапаможа не выдаткаваць лішняга.

Каб купіць прадукты на тры-чатыры дні, прыйдзецца быць гатовым да марнавання амаль 200 злотых (Br658 тыс). У спісе Кавальскай - стандартны набор.

Мясны і рыбны аддзелы:

(У матэрыяле ўсе разлікі ў пераводзе з польскага злотага на беларускія рублі заснаваныя на курсе злотага ў абменных пунктах «Беларусбанка». У дзень падрыхтоўкі публікацыі за 1 злоты прапаноўвалі 3290 беларускіх рублёў. Пасля пераліку на рублі кошты ў матэрыяле акруглены да тысяч)

1 кг астуджанай свініны (шыйны кавалак) без косткі - 60 тысяч рублёў (так, «скварка» ў суседзяў прыкладна ў 2 разы таннейшы, чым у «дзяржаве для народа» - заўв.рэд.)

1 кг астуджанай ялавічыны на гуляш (лапатачная частка) - 92 тыс.

астуджаная курыца 1,5 кг - 30 тыс.

астуджаная фарэль 0,5 кг - 39 тыс.

250-грамовая ўпакоўка сасісак вышэйшага гатунку «Berlinki» - 11 тыс.

бляшанка тунца ў алеі - 20 тыс.

нарвежскі вэнджаны ласось без кансервантаў у вакуумнай упакоўцы «Suempol» 100 г - 29 тыс.

Малочныя прадукты:

2 літры малака 3,2% - 16 тыс.

200 г жоўтага сыру (мясцовай вытворчасці, недарагі «Гаўда» 26%) - 9 тыс.

200 г сыру фета (мясцовай вытворчасці, «Mlekovita» 18%) - 8 тыс.

10 слоічкаў ёгурта («7 Zbóż» - «7 зерня», па 150 г, 2,5%) - 39 тыс.

Крупы і макаронныя вырабы:

1 кг мукі (адна з самых папулярных, «Шыманоўская» вышэйшы гатунак) - 8 тыс.

1 кг рысу (недарагі, «Lestello») - 11 тыс.

1 кг спагецці «Spaghetti Melissa Primo Gusto», вытворчасць Грэцыя - 19 тыс.

Гародніна і садавіна:

3 кг польскай бульбы - 7 тыс.

1 кг памідор кісцевы з галінкамі (духмяныя і не самыя танныя, Польшча) - 18 тыс.

галоўка салаты зялёнай «Айсберг» - 5 тыс.

1 кг польскіх грунтавых агуркоў (сярэдні цэнавы дыяпазон) - 13 тыс.

0,5 кг свежых шампіньёнаў - 12 тыс.

2 літры 100% апельсінавага соку «Тымбарк» - 23 тыс.

1 кг бананаў (Калумбія) - 9 тыс.

1 кг персікаў (Грэцыя) - 12 тыс.

Упакоўка 600 г зялёнага вінаграду (Чылі) - 14 тыс.

іншае:

бохан хлеба (1 кг) - 10 тыс.

100-грамовая шакаладка «Ведэль» - 8 тыс.

пачак кукурузных шматкоў «Нестле» 250 г - 11 тыс.

літр сланечнікавага алею - 21 тыс.

пачак масла «Экстра» 200 г, 82% - 11 тыс.

дзясятак яек (памер «L» - больш за сярэдні) - 13 тыс.

бутэлька кетчупу «Влоцлавек», польскай вытворчасці, 430 г - 13 тыс.

пачак молатай кавы «Якабс Kronung» 500 г - 66 тыс.

Загрузіўшы каляску даверху прадуктамі, Кавальскія заплацілі на касе 200 злотых і 30 грошаў (Br659 тыс). Некаторыя прадукты, такія як мясцовыя сезонныя садавіну і ягады, палякі больш ахвотна купляюць на невялікіх рынках, чым у гіпермаркетах.

Асобны радок выдаткаў - алкаголь і цыгарэты. Апошнія каштуюць значна даражэй, чым у Беларусі. Да прыкладу, за пачак «Захаду» прыйдзецца заплаціць 13 злотых (амаль Br 43 тыс). Цэны на гарэлку - ад 20 злотых (каля Br 66 тыс), а выбіраючы піва, пан Кавальскі можа стаць перад няпростай дылемай: звыклы «Carlsberg» за 2,99 або экзатычная «Крыніца» за такі ​​ж кошт (Br 10 тыс).

У сярэднестатыстычнай польскай сям'і марнаванні на тытунь і алкаголь складаюць 2,6% усіх выдаткаў. У сям'і Кавальскіх гэтая сума склала б 156 злотых у месяц (Br 513тыс).

А цяпер вы можаце самастойна супаставіць варшаўскія кошты з тымі, якія бачыце ў нашых крамах.