Польскія ўлады вылучылі кандыдатуру Сікорскага на пасаду Эштан
7- 1.08.2014, 10:40
- 5,994
Польшча афіцыйна вылучыла кіраўніка МЗС на пасаду вярхоўнага прадстаўніка ЕЗ у пытаннях замежнай палітыкі і палітыкі бяспекі.
Як паведамляе карэспандэнт УНІАН з Варшавы, адпаведную інфармацыю, якая раней з'явілася ў польскіх СМІ, пацвердзіў кіраўнік урада Дональд Туск.
«Сікорскі, на думку PIS (найбуйнейшая апазіцыйная партыя ў Польшчы), што тычыцца Расеі, з'яўляецца занадта мяккім, а, на думку еўрапейскіх палітыкаў, занадта суровым. На думку ўсіх - кампетэнтным. Гэта значыць, менавіта тым», - напісаў кіраўнік польскага ўраду ўчора ўвечары ў «Твітэры».
Польскае агенцтва РАР адзначае, што папярэдняя фаварытка на гэтую пасаду, кіраўніца італійскага МЗС Федэрыка Магерыні, не была зацверджаная на саміце ў ліпені праз яе занадта мяккую пазіцыю што да Расеі. Агенцтва нагадвае, што прызначэнне новых кіраўнікоў на пасады ў Еўрапейскім Звязе пасля праведзеных у траўні гэтага года выбараў павінна завяршыцца да верасня, а новая Еўракамісія павінна пачаць працаваць з 1 лістапада. Пастанова што да кандыдатуры новага кіраўніка дыпламатыі ЕЗ павінна быць прынятая на чарговым саміце Еўразвяза 30 жніўня.
Цяпер гэтую пасаду мае Кэтрын Эштан (Вялікая Брытанія). 51-гадовы Сікорскі ўзначальвае польскае МЗС з 2007 года. Палітычную кар'еру ён пачаў у пачатку 90-х гадоў і, сярод іншага, займаў пасаду міністра абароны. Да гэтага працаваў журналістам.