Ізраіль адмовіўся ад перамоваў з Хамасам

Ізраіль не будзе ўдзельнічаць у перамовах у Каіры, пакуль працягваюцца ракетныя абстрэлы з сектара Газа.

Пра гэта заявіў прэм'ер-міністр краіны Беньямін Нэтаньяху. Аперацыя "непарушная скала" будзе працягнутая. Паводле звестак NEWSru Israel, на працягу пятніцы і суботы па Ізраілю былі выпушчаныя дзясяткі ракет, Армія абароны Ізраіля (ЦАХАЛ) працягвае наносіць удары па палесцінскіх тэрыторыях.

Нэтаньяху ў нядзелю заявіў: "Мы не будзем весці перамовы пад агнём, і ні на адным з этапаў мы не заяўлялі, што аперацыя завершаная... Аперацыя будзе працягнутая да таго часу, пакуль яе мэта - аднаўленне працяглага спакою - не будзе дасягнутая", - падкрэсліў прэм'ер.

Таксама кіраўнік Ізраіля падкрэсліў: "Я казаў з самага пачатку і паўтараў на працягу ўсёй аперацыі, што яна будзе працяглай і запатрабуе вытрымкі і цярпення".

У мінулыя пятніцу-суботу з сектара Газа па тэрыторыі Ізраіля былі выпушчаныя дзясяткі ракет. Раніцай у нядзелю абстрэлы аднавіліся. Праз ракетна-мінамётныя абстрэлы, якія працягваюцца, у нядзелю адмененыя заняткі ў дзіцячых адукацыйных установах і летніх лагерах у многіх населеных пунктах, размешчаных у радыусе некалькіх дзясяткаў кіламетраў ад мяжы сектара Газа.

На працягу суботы, 9 жніўня, вайскова-паветраныя сілы Арміі абароны Ізраіля нанеслі ўдары больш, чым па 60 аб'ектах тэрарыстаў і асобных групах баевікоў у сектары Газа, паведамляе вайсковая прэс-служба.

У кіраўніцтве "Хамаса" і "Ісламскага джыхаду" кажуць, што перамовы ў Каіры зайшлі ў тупік, абвінавачваючы ў гэтым урад Ізраіля, які адмаўляецца ісці на саступкі. "Хамас" патрабуе аднаўлення аэрапорта ў Газе і будаўніцтва марскога порта, у які маглі б заходзіць міжнародныя караблі. Пра гатоўнасць аказаць дапамогу ў рэалізацыі гэтага праекта ўжо заявілі Турцыя і Нарвегія. Акрамя таго, "Хамас" дамагаецца атрымання фінансавай дапамогі, сцвярджаючы, што сродкі пойдуць на аднаўленне грамадзянскай інфраструктуры.