Мастакі з Бэрліна замянілі сцягі на Бруклінскім мосце
- 13.08.2014, 9:52
- 5,701
Два мастакі з Нямеччыны ўзялі на сябе адказнасць за замену сцягоў на вежах Бруклінскага моста ў Нью-Ёрку.
У ноч з 21 на 22 ліпеня афіцыйныя сцягі ЗША былі знятыя, а на іх месцы з'явіліся пашытыя ўручную белыя палотнішчы з зоркамі і палосамі. Паліцыя была збянтэжаная інцыдэнтам, што прадэманстраваў сур'ёзныя хібы ў сістэме бяспекі вядомага моста.
У сваёй заяве мастакі з Бэрліна Міша Ляйнкаўф і Маціяс Вермке паведамляюць, што яны размясцілі белыя сцягі, каб адзначыць значэнне паблік-арта для Нью-Ёрка як глабальнага цэнтра творчасці, піша BBC.
"Яны з беражлівасцю дзейнічалі на мосце і захоўвалі пашану да сцягоў, якой патрабуе пратакол абыходжання са сцягам ЗША", - гаворыцца ў апублікаваным прэс-рэлізе з нагоды акцыі. Мастакі абяцаюць вярнуць старыя сцягі.
Ляйнкаўф і Вермке дадалі, што белы сцяг таксама з'яўляецца данінай памяці аўтару праекта Бруклінскага моста архітэктару нямецкага паходжання Джону Аўгусту Роблінгу.
Архітэктар, які з'ехаў з Нямеччыны ў ЗША ў пошуках больш вольнага жыцця, так і не здолеў зрэалізаваць свой праект. Ён загінуў 22 ліпеня 1869, пасля таго як атрымаў траўму на месцы пабудовы моста. Праект сканчаў ягоны сын, які памёр 21 ліпеня 1926 года.