Віктар Шандаровіч: Расейскае ноў-хаў - гэта хаос
19- 13.08.2014, 11:31
- 23,618
Выраб бяды ў прамысловых маштабах і яе падтрыманне ў ручным рэжыме - вось інтарэсы Расеі.
У аўторак расейская аўтакалона з 280 вайсковых грузавікоў, якія нібыта вязуць гуманітарную дапамогу, вырушыла з падмаскоўнага Нара-Фамінска ў кірунку ўсходу Украіны. Расея і гуманітарны канвой... На гэтую тэму разважае пісьменнік-сатырык, калумніст выдання «Гордан» Віктар Шандаровіч.
«Расейская дапамога ахвярам гуманітарнай катастрофы на паўднёвым усходзе Украіны цалкам укладваецца ў расейскую народную прыпеўку: «Сама садок я садзіла - сама буду паліваць».
Садок катастрофы на тэрыторыі чужой, яшчэ ўчора братняй дзяржавы, мы садзім з упартасцю і разнастайнасцю, суздром неймавернымі ў мірным жыцці. Калі б з такой настойлівасцю і такім майстэрствам мы б шліфавалі тэхналогіі айчыннай аўтапрамысловасці, Расея даўно б вырабляла «Мэрсэдэсы».
Але «Мэрсэдэс» - гэта нецікава. Гэта і немцы могуць. Наша ноў-хаў - хаос! Выраб бяды ў прамысловых маштабах і яе падтрыманне ў ручным рэжыме. Стварэнне варункаў, неспалучальных з жыццём...
Ну а потым, як належыць спадкаемцы краіны Саветаў, - барацьба за мір! Гэта ўваходзіць у камплект. Гуманітарны аспэкт. Хто не схаваўся, Пуцін не вінаваты...
Так выглядае поўны вытворчы цыкл.
Зрэшты, нічога новага: выпадак апісаны ў літаратуры. Гасподзь, наслаўшы на Ёва агонь, хваробы і смерці блізкіх, потым рассоўвае аблокі і здзіўленым голасам кажа: Ого! Ды ў цябе праблемы, брат. Гэта ж трэба. Я думаю, уголас разважае Гасподзь, гэта таму, што ты недастаткова любіш мяне, пакуль я знішчаю цябе...
І ад шчодрасці сваёй, у адмысловай дабрыні сваёй, пасылае гуманітарную дапамогу.
За спінай у Госпада ў тым старым сюжэце, як вы памятаеце, стаяў шатан», - піша ён.