Геапалітычны футбол

Паміж пагрозай заходніх санкцый і страхам перад Пуціным.

У прэсу папаў запіс меркаванай сустрэчы расейскіх футбольных функцыянераў і кіраўнікоў буйных футбольных клубаў, паведамляе The New York Times (пераклад - Инопресса.ру). "Складваецца ўражанне, што, абмяркоўваючы галасаванне аб прыёме трох крымскіх клубаў у расейскую лігу, яны панікуюць праз тое, што іх клубы могуць быць выключаныя з буйных еўрапейскіх турніраў, а Расея можа пазбавіцца права на правядзенне ЧС-2018", - піша журналіст.

Мяркуючы паводле запісу, гэтыя людзі "адчуваюць агіду да кроку, які можа наклікаць новыя заходнія санкцыі ці выклікаць незадавальненне прэзідэнта Пуціна. У размове яны наважваюцца звярнуцца за кансультацыяй да Пуціна, што, відавочна, парушае суровыя правілы ФІФА, які абвяшчае, што нацыянальныя футбольныя асацыяцыі павінны быць вольныя ад палітычнага ўплыву", гаворыцца ў артыкуле.

Скарочаная расшыфроўка запісу была апублікаваная ў панядзелак "Новай газетай", тлумачыць выданне. The New York Times не ўдалося праверыць запіс на сапраўднасць у незалежных крыніцах, "але адзін з удзельнікаў у інтэрв'ю маскоўскай радыёстанцыі, відавочна, пацвердзіў, што сустрэча мела месца", піша карэспандэнт.

"Запіс характэрны тым, што некалькі багатых людзей выказваюць страх угнявіць Крэмль. Таксама гэта рэдкая магчымасць убачыць абсалютную ўладу Пуціна ў Расеі і псіхалагічны эфект, які аказваюць заходнія санкцыі на расейскі істэблішмэнт", - працягвае аўтар. Сярод меркаваных удзельнікаў гутаркі - шэраг найбагацейшых расейцаў, кіраўнікі вядучых клубаў - "Зеніта" і ЦСКА, а таксама кіраўнік РЧ Уладзімір Якунін.

"31 ліпеня расейская футбольная асацыяцыя склікала кіраўнікоў, каб вынесці на галасаванне пытанне аб прыёме трох крымскіх клубаў у расейскія нацыянальныя лігі", - сцвярджае газета. На мінулым тыдні міністр спорту Расеі абвясціў, што клубы СКЧФ з Севастопаля, "Жамчужына" з Ялты і ТСК з Сімферопаля - будуць прынятыя ў расейскую лігу. Украіна заявіла, што яе каманды скрадзеныя.

Мяркуючы паводле запісу, "кіраўнікі апынуліся ў не камфортным становішчы - паміж пагрозай заходніх санкцый у выпадку, калі яны рушаць услед лініі Крамля, і страхам не паслухацца Пуціна", - гаворыцца ў артыкуле.

Хоць удзельнікам відавочна не хочацца ахвяраваць сваімі дзелавымі інтарэсамі дзеля крымскага футбола, магутнасць слоў Пуціна на відавоку. "У асаблівасці кіраўнікі, напэўна, асцерагаюцца рабіць усялякія крокі, праз якія Расея можа пазбавіцца ролі гаспадыні ЧС-2018", - піша аўтар, нагадваючы, што брытанскі віцэ-прэм'ер Нік Клег ужо прапаноўваў гэта зрабіць.

"Стэнаграма - выключны шанец убачыць, як Крэмль кіруе нібыта незалежнымі грамадскімі арганізацыямі, аддаючы бясспрэчныя распараджэнні зверху праз высокапастаўленых памочнікаў", - рэзюмуе выданне. Удзельнікі сустрэчы спрабуюць адгадаць, чаго жадаюць ад іх палітычныя босы, і ў выніку наважваюць папрасіць вярхі аб выразнай дырэктыве.